തിരുവനന്തപുരം: തദ്ദേശ തെരഞ്ഞെടുപ്പിലെ അമിത വിശ്വാസം അപ്രതീക്ഷിത പരാജയത്തിന് കാരണമായെന്ന് സിപിഎം സംസ്ഥാന സമിതിയോഗത്തിന്റെ വിലയിരുത്തല്. പ്രാദേശിക സംഘടനാ പ്രവര്ത്തനത്തില് വീഴ്ചയുണ്ടായി. സംസ്ഥാന സര്ക്കാരിന്റെ പ്രവര്ത്തനം മികച്ചതെങ്കിലും വ്യാജപ്രചരണങ്ങള് തിരിച്ചടിച്ചു.
നിയമസഭാ തെരഞ്ഞെടുപ്പിനെ നേരിടാന് വീടുകള് കയറി ഇറങ്ങും. കുടുംബസംഗമം നടത്തുന്നതിനൊപ്പം അണികളെ സമരത്തിലേക്ക് ഇറക്കി സംഘടന ശക്തിപ്പെടുത്താനും തീരുമാനം. പ്രദേശിക തലത്തില് സംഘടനാവീഴ്ചയുണ്ടായെന്നും നഗരമേഖലയില് സംഘടനാ ദൗര്ബല്യം ഉണ്ടായെന്നും യോഗം വിലയിരുത്തിയെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന് വാര്ത്താസമ്മേളനത്തില് പറഞ്ഞു.
അതേസമയം, വോട്ട് വര്ദ്ധനയുടെ കണക്ക് നിരത്തി പരാജയത്തെ ന്യായീകരിക്കുകയും ചെയ്തു. നിയമസഭാ തെരഞ്ഞെടുപ്പില് മികച്ചവിജയം തിരിച്ചുപിടിക്കാന് ജനുവരി 15 മുതല് 22 വരെ നേതാക്കള് ഉള്പ്പെടെ വീടുകളില് കയറിയിറങ്ങി ജനസമ്പര്ക്ക പരിപാടിയും കുടുംബയോഗങ്ങളും സംഘടിപ്പിച്ച് ശബരിമല ഉള്പ്പെടെ വിഷയങ്ങളില് സംസാരിക്കും. കൂടാതെ അണികളെ കേന്ദ്രസര്ക്കാരിനെതിരെ സമരത്തിനിറക്കി സംഘടന ശക്തിപ്പെടുത്താനും തീരുമാനമുണ്ട്.
തൊഴിലുറപ്പ് പദ്ധതിയില് തൊഴിലാളികളെ തെറ്റിദ്ധരിപ്പിച്ച് സമരത്തിനിറക്കാനാണ് ആദ്യനീക്കം. അതിനായി എല്ലാ വാര്ഡുകളിലും തൊഴിലുറപ്പ് തൊഴിലാളികളുടെ അസംബ്ലി നടത്തും. എല്ലാ ലോക്കല്കമ്മറ്റികളിലും പൊതു സമ്മേളനം നടത്തും. 12 ന് മുഖ്യമന്ത്രിയും എംഎല്എമാരും എംപിമാരും രക്തസാക്ഷി മണ്ഡപത്തില് സത്യഗ്രഹം നടത്തും.
ജനുവരി 15 ന് തൊഴിലുറപ്പ് തൊഴിലാളികളുമായി തിരുവനന്തപുരത്ത് രാജ് ഭവനിലേക്കും മറ്റിടങ്ങളില് ജില്ലാ കേന്ദ്രങ്ങളിലേക്കും മാര്ച്ച് നടത്തും. കൂടാതെ ഫെബ്രുവരിയില് മൂന്ന് മേഖലകളിലായി എല്ഡിഎഫ് ജാഥയും നടത്തുമെന്നും ഗോവിന്ദന് പറഞ്ഞു.
അതേസമയം, ശബരിമല സ്വര്ണക്കൊള്ള തിരിച്ചടിയായോ എന്നതില് ഇത്തവണയും വ്യക്തതവരുത്താന് ഗോവിന്ദന് തയാറായില്ല. ശബരിമലയില് വ്യാജ പ്രചാരണം നടത്തിയെന്നും എന്നാല് അതുവേണ്ട വിധം ഏശിയില്ലെന്നും അദ്ദേഹം പറഞ്ഞു.
