പത്തനംതിട്ട: ശബരിമല സ്വര്ണക്കൊള്ള കേസില് സംശയത്തിന്റെ നിഴലിലുള്ള ഡി. മണി തിരുവനന്തപുരത്ത് നിരവധി തവണ എത്തിയതായും അന്വേഷണ സംഘത്തിനു വിവരം ലഭിച്ചു. ഓട്ടോ ഡ്രൈവറായി ജീവിതം തുടങ്ങി വിഗ്രഹ കടത്തുകാരനായി മാറിയ ഡി. മണി കേരളത്തില് ഇറിഡിയം തട്ടിപ്പും നടത്തിയെന്ന് സൂചന.
മണിയുടെ ദിണ്ടിഗലിലെ ചില സുഹൃത്തുക്കളില് നിന്നാണ് ഇതു സംബന്ധിച്ച നിര്ണായക വിവരങ്ങള് എസ്ഐടിക്ക് ലഭിച്ചത്. കേരളത്തില് ശബരിമലയില് മാത്രമേ ദര്ശനം നടത്തിയിട്ടുള്ളു എന്നാണ് ഇയാള് മാധ്യമങ്ങളോടു പറഞ്ഞതെങ്കിലും ശ്രീപദ്മനാഭ സ്വാമി ക്ഷേത്രം സന്ദര്ശിച്ചതായും വിവരം ലഭിച്ചിട്ടുണ്ട്.
ഇറിഡിയം തട്ടിപ്പിലൂടെ മാത്രം 25 കോടിയിലധികം രൂപ നേടിയെന്നാണ് അറിവ്. ഇതിനു റിസര്വ് ബാങ്കിന്റെ പേരില് വ്യാജ രേഖ സൃഷ്ടിച്ചതിനു കേസുണ്ടെന്നാണ് വിവരം. മനുഷ്യക്കടത്തിലും ആരോപണ വിധേയനാണ് മണി.
കേരളത്തിന്റെ വിവിധ ഭാഗങ്ങളില് നടന്ന ഇറിഡിയം തട്ടിപ്പുകള്ക്കു പിന്നില് തമിഴ്നാട് സംഘത്തിന് ബന്ധമുണ്ടെന്ന് പോലീസ് നേരത്തേ വ്യക്തമാക്കിയിരുന്നു. കോടികള് വിലമതിക്കുന്ന ഇറിഡിയം വാഗ്ദാനം ചെയ്ത് ഹരിപ്പാട് സ്വദേശിയില് നിന്നും 75.6 ലക്ഷം രൂപാ തട്ടിയതിന് കഴിഞ്ഞ 20 ന് തിരുവനന്തപുരത്ത് ഒരു കുടുംബത്തിലെ നാലു പേര് അറസ്റ്റിലായിരുന്നു. തമിഴ്നാട്ടില് നിന്നുള്ള സംഘമാണ് 10 കോടി വിലമതിക്കുന്ന ഇറിഡിയം നല്കാമെന്ന് തങ്ങളെ അറിയിച്ചതെന്ന് അറസ്റ്റിലായവര് പോലീസിനോട് വെളിപ്പെടുത്തിയിരുന്നു. ഇതിനായി പലരില് നിന്നും ഇവര് പത്തു കോടിയോളം രൂപാ വാങ്ങിയതായാണ് അറിവ്. ഇതിന് പിന്നില് ഡി. മണിയുടെ സംഘത്തിന് ബന്ധമുണ്ടോ എന്ന കാര്യവും അന്വേഷണ വിധേയമാക്കാനാണ് തീരുമാനം.
തിരുവനന്തപുരത്ത് മണി പലകുറി വന്നുവെന്ന് ഉറപ്പിക്കാന് മൊബൈല് ഫോണ് ലൊക്കേഷനുകള് പരിശോധിക്കുകയാണ് എസ്ഐടി. ബാലമുരുകന്റേത് അടക്കം മൂന്നു പേരുടെ സിം കാര്ഡുകളാണ് മണി ഉപയോഗിക്കുന്നത്. നേരായ മാര്ഗത്തിലുള്ള ബിസിനസ് അല്ല ഇയാളുടേത് എന്നതിനാലാണ് വ്യാജ നമ്പരുകള് ഉപയോഗിക്കുന്നതെന്ന നിഗമനത്തിലാണ് അന്വേഷണ സംഘം. 2020 ഒക്ടോബര് 26ന് ഉണ്ണികൃഷ്ണന് പോറ്റിയും ദേവസ്വം ബോര്ഡുമായി ബന്ധമുള്ള ഉന്നതനും ഡി. മണിയും വിഗ്രഹ കൈമാറ്റത്തിന് ഒത്തുകൂടിയ തിരുവനന്തപുരത്തെ ഹോട്ടല് കണ്ടെത്താനും എസ്ഐടി ശ്രമം ആരംഭിച്ചുണ്ട്. ഇതിനായി എസ്ഐടിക്ക് രഹസ്യ വിവരം കൈമാറിയ പന്തളത്തെ പ്രവാസി വ്യവസായിയെ വീണ്ടും ചോദ്യം ചെയ്യാനും സാധ്യതയുണ്ട്.
ദിണ്ടിഗലിലെ ഓഫീസില് തിരുപ്പതി വെങ്കിടേശ്വരന്റേത് ഉള്പ്പെടെ നിരവധി ഹൈന്ദവ ദേവീദേവന്മാരുടെ ചിത്രം ഉണ്ടെങ്കിലും ഇയാള് പെന്തകോസ്തുകാരനാണെന്നാണ് നാട്ടുകാര് പറയുന്നത്. റിയല് എസ്റ്റേറ്റ് ബ്രോക്കര്മാരായ അമ്പതോളം പേര് ഇയാള്ക്കു സഹായത്തിനുണ്ട്. ഇവരില് പലര്ക്കും ചില അധോലേക, ക്വട്ടേഷന് ബന്ധങ്ങളും ഉണ്ടെന്നാണ് സൂചന.
