തൊടുക്കും, പ്രഹരിക്കും, തകര്‍ക്കും; ആകാശ് എന്‍ ജി പരീക്ഷണം വിജയം

ന്യൂദല്‍ഹി: ഭാരതം സ്വന്തമായി വികസിപ്പിച്ച ആകാശ് എന്‍ജി (നെക്സ്റ്റ് ജനറേഷന്‍) മിസൈല്‍ സംവിധാനം വിജയകരമായി പരീക്ഷിച്ചു. ആകാശ് മിസൈലുകളടങ്ങിയ പ്രതിരോധ സംവിധാനത്തിന്റെ പരിഷ്‌കരിച്ച പതിപ്പാണിത്. ആകാശ് മിസൈല്‍ പ്രതിരോധ സംവിധാനം ഓപ്പറേഷന്‍ സിന്ദൂറില്‍ വലിയ വിജയമായിരുന്നു.

പരീക്ഷണം പൂര്‍ണ വിജയമായിരുന്നെന്നും വിവിധ ലക്ഷ്യങ്ങളെ വിജയകരമായി ഭേദിച്ചെന്നും പ്രതിരോധ മന്ത്രാലയം അറിയിച്ചു. ഇത് അധികം വൈകാതെ സൈന്യത്തില്‍ ഉള്‍പ്പെടുത്തും.

70 മുതല്‍ 80 കിലോമീറ്റര്‍ വരെ ദൂരപരിധിയുള്ള, മധ്യദൂര ഉപരിതല വ്യോമ മിസൈലാണ് ആകാശ് എന്‍ജി. 10 സെക്കന്‍ഡിനുള്ളില്‍ ആദ്യ മിസൈല്‍ വിക്ഷേപിക്കും. 20 സെക്കന്‍ഡിനുള്ളില്‍ മൂന്നു മിസൈലുകള്‍ ഒരുമിച്ചു തൊടുക്കും. ഒരേ സമയം 10 ലക്ഷ്യങ്ങളെ നേരിടാനാകും.

ഇതുവരെ സൈന്യത്തിന്റെ പക്കലുള്ള ആകാശ് മിസൈലുകള്‍ക്ക് 25 മുതല്‍ 30 കിലോമീറ്റര്‍ വരെ ആയിരുന്നു ദൂരപരിധി. എന്നാല്‍ ആകാശ് എന്‍ ജി എന്ന പരിഷ്‌ക്കരിച്ച പതിപ്പിന്റെ പരിധി 70 മുതല്‍ 80 കിലോമീറ്റര്‍ വരെയാണ്. 120 കിലോമീറ്റര്‍വരെയുള്ള ലക്ഷ്യങ്ങളെ നിരീക്ഷിക്കാനും 80 കിലോമീറ്റര്‍ ദൂരത്തുള്ളവയെ നേരിടാനും ഇതിലെ റഡാര്‍ സംവിധാനത്തിന് സാധിക്കും.

ഡ്രോണുകള്‍, യുദ്ധവിമാനങ്ങള്‍, മിസൈലുകള്‍ എന്നിവ തകര്‍ക്കുന്ന ആകാശ് എന്‍ ജി കാനിസ്റ്ററൈസ്ഡ് ലോഞ്ചറാണ് ഉപയോഗിക്കുന്നത്. അതിനാല്‍ എളുപ്പത്തില്‍ വിന്യസിക്കാനും കൈകാര്യം ചെയ്യാനും സാധിക്കും. റോഡ്, റെയില്‍, വിമാനം എന്നിവ വഴി കൊണ്ടുപോകാം. പഴയ ആകാശിലെ രാംജെറ്റ് എന്‍ജിനെ അപേക്ഷിച്ച് ഭാരം കുറഞ്ഞ ഡ്യുവല്‍-പള്‍സ് സോളിഡ് റോക്കറ്റ് മോട്ടോറാണ് ഇതില്‍. ഇത് മിസൈലുകളുടെ പ്രവര്‍ത്തനം മെച്ചപ്പെടുത്തും.

ശത്രുവിനെയും മിത്രത്തെയും തിരിച്ചറിയാന്‍ സഹായിക്കുന്ന മള്‍ട്ടി-ഫങ്ഷന്‍ റഡാറാണ് ഇതില്‍ ഉപയോഗിക്കുന്നത്. കൂടാതെ, 45 കിലോ മീറ്റര്‍ ദൂരത്തുള്ള ലക്ഷ്യങ്ങളെവരെ പിന്തുടരാന്‍ സാധിക്കുന്ന ഇലക്ട്രോ-ഒപ്റ്റിക്കല്‍ ടാര്‍ഗെറ്റിങ് സിസ്റ്റവും ഇതിനുണ്ട്. ഏതു കാലാവസ്ഥയിലും പ്രവര്‍ത്തിക്കും. വളരെ അകലെയുള്ള ശത്രുവിമാനങ്ങളെയും മിസൈലുകളെയും കൃത്യമായി തിരിച്ചറിഞ്ഞ് നിമിഷങ്ങള്‍ക്കുള്ളില്‍ തകര്‍ക്കാന്‍ ശേഷിയുണ്ട്.