തിരുവനന്തപുരം: വ്യാജ മുന്ഗണനാ വിഭാഗം റേഷന് കാര്ഡുകള് നിര്മിച്ച കേസ് വിജിലന്സ് അന്വേഷിക്കാന് ഉത്തരവ്. ഭക്ഷ്യവകുപ്പിന്റെ വെബ്സൈറ്റില് കടന്നുകയറി നൂറ്റി അമ്പതോളം മുന്ഗണനാ വിഭാഗം (പിങ്ക്) കാര്ഡുകള് നിര്മിക്കുകയായിരുന്നു.
തിരുവനന്തപുരം സൗത്ത് സിറ്റി റേഷനിങ് ഓഫീസിലെ ക്ലാര്ക്കിന്റെയും റേഷനിങ് ഇന്സ്പെക്ടറുടെയും ലോഗിന് ഐഡിയും പാസ്വേഡും ചോര്ത്തിയാണ് കാര്ഡുകള് നിര്മിച്ചത്. സിവില് സപ്ലൈസ് പോലീസിന് നല്കിയ പരാതിയുടെ അടിസ്ഥാനത്തില് ബീമാപള്ളി ബിഎഫ്എ ജംഗ്ഷനില് ഓണ്ലൈന് സേവനകേന്ദ്രം നടത്തുന്ന ഹസീബ് ഖാന്, ബീമാപള്ളിയില് റേഷന്കട നടത്തുന്ന സഹദ് ഖാന് എന്നിവരെ വഞ്ചിയൂര് പോലീസ് അറസ്റ്റ് ചെയ്തു.
തുടര്ന്ന് വിശദമായ അന്വേഷണം നടത്തണമെന്ന് ആവശ്യപ്പെട്ട് സിവില് സപ്ലൈസ് വിഭാഗം മുഖ്യമന്ത്രിക്ക് നല്കിയ റിപ്പോര്ട്ടിന്റെ അടിസ്ഥാനത്തിലാണ് വിജിലന്സ് അന്വേഷണത്തിന് ഉത്തരവിട്ടത്. ബീമാപള്ളി മേഖല കേന്ദ്രീകരിച്ചാണ് പണം വാങ്ങി വ്യാജ റേഷന്കാര്ഡുകള് നിര്മിച്ചത്.
