ന്യൂദല്ഹി: സ്വയംപര്യാപ്തമായ, ദാരിദ്ര്യമില്ലാത്ത, അടിസ്ഥാന സൗകര്യങ്ങളാല് സമ്പന്നമായ വികസിത ഗ്രാമമാണ് വിബി ജി റാം ജി ബില്ലിലൂടെ കേന്ദ്രസര്ക്കാര് ലക്ഷ്യമിടുന്നതെന്ന് കേന്ദ്ര ഗ്രാമവികസനവകുപ്പ് മന്ത്രി ശിവരാജ് സിങ് ചൗഹാന്. ലോക്സഭയില് നടന്ന ചര്ച്ചയ്ക്ക് മറുപടി പറയുകയായിരുന്നു അദ്ദേഹം. മഹാത്മാഗാന്ധി മാതൃകയും പ്രചോദനവുമാണ്. അദ്ദേഹത്തിന്റെ ആദര്ശങ്ങള് പിന്തുടരുകയും നടപ്പാക്കുകയും ചെയ്യും. ഗ്രാമങ്ങള് ഭാരതത്തിന്റെ ആത്മാവാണെന്ന് ഗാന്ധി തന്നെ പറഞ്ഞിട്ടുണ്ട്. ഗാന്ധിയുടെ സ്വയംപര്യാപ്ത ഗ്രാമമെന്ന സങ്കല്പം യാഥാര്ത്ഥ്യമാക്കാനാണ് പ്രധാന മന്ത്രി നരേന്ദ്ര മോദിയുടെ നേതൃത്വത്തിലുള്ള സര്ക്കാര് ഈ പദ്ധതിയ്ക്ക് തുടക്കമിടുന്നതെന്നും അദ്ദേഹം പറഞ്ഞു.
കോണ്ഗ്രസ് അഭിനയിക്കുമ്പോള് ഞങ്ങള് പ്രവൃത്തിയില് വിശ്വസിക്കുന്നു. യുപിഎ സര്ക്കാരിന്റെ കാലത്ത് 1660 കോടി തൊഴില് ദിനങ്ങള് മാത്രമാണ് സൃഷ്ടിച്ചത്. എന്നാല് മോദി സര്ക്കാര് 3210 കോടി തൊഴില് ദിനങ്ങള് സൃഷ്ടിച്ചു. കോണ്ഗ്രസ് സര്ക്കാര് എംഎന്ആര്ഇജിഎയ്ക്ക് 2,13,220 കോടി രൂപ ചെലവഴിച്ചപ്പോള് എന്ഡിഎ സര്ക്കാര് 8,53,810 കോടി ചെലവഴിച്ചു. നൂറു ദിവസത്തെ തൊഴില് ഉറപ്പ് നല്കിയിരുന്നു, ഇപ്പോള് അത് 125 ദിവസമായി വര്ദ്ധിപ്പിച്ചു. സംസ്ഥാന വിഹിതം ഉള്പ്പെടെ 1.51 ലക്ഷം കോടിയിലധികം രൂപയാണ് മാറ്റിവെക്കേണ്ടത്. ഇതില് 95,000 കോടിയിലധികം രൂപ കേന്ദ്രം വഹിക്കും.
വികസിത ഗ്രാമങ്ങള് എങ്ങനെയായിരിക്കണമെന്നതിനെക്കുറിച്ച് സര്ക്കാര് സമഗ്ര പദ്ധതി തയാറാക്കിയിട്ടുണ്ടെന്ന് ശിവരാജ് സിങ് ചൗഹാന് ബിജെപി ഓഫീസില് നടത്തിയ വാര്ത്താസമ്മേളനത്തില് പറഞ്ഞു.
ഗാന്ധിയുടെ പേര് നല്കിയത് വോട്ടിനായി
തൊഴിലുറപ്പ് പദ്ധതി ആദ്യം നടപ്പാക്കിയത് മഹാത്മാഗാന്ധിയുടെ പേരില് ആയിരുന്നില്ലെന്ന് കേന്ദ്ര ഗ്രാമവികസനവകുപ്പ് മന്ത്രി ശിവരാജ് സിങ് ചൗഹാന്. ലോക്സഭയില് നടന്ന ചര്ച്ചയ്ക്ക് മറുപടി പറയുകയായിരുന്നു അദ്ദേഹം.
എന്ആര്ഇജിഎ എന്നായിരുന്നു ആദ്യം പേര് നല്കിയിരുന്നത്. 2009ല് തെരഞ്ഞെടുപ്പ് വന്നപ്പോള് കോണ്ഗ്രസ് ഗാന്ധിജിയെ ഓര്മിച്ചു. വോട്ടിനായാണ് ഗാന്ധിജിയുടെ പേര് ചേര്ത്തത്. കോണ്ഗ്രസ് ഒരിക്കലും ഗാന്ധിജിയെ ശ്രദ്ധിച്ചില്ല, ബഹുമാനിച്ചില്ല എന്നാല് ഞങ്ങള് ഗാന്ധിജിയെ ബഹുമാനിക്കുന്നു. നെഹ്റു കുടുംബത്തിന്റെ പേരുകള് വിവിധ പദ്ധതികള്ക്കും സ്ഥാപനങ്ങള്ക്കും നല്കുന്നതില് കോണ്ഗ്രസിന് അമിത താല്പര്യം ഉണ്ടെന്ന് വിവിധ പദ്ധതികളുടെ പേരുകള് അക്കമിട്ട് നിരത്തി ശിവരാജ് സിങ് ചൗഹാന് ചൂണ്ടിക്കാട്ടി.
