കരുനാഗപ്പള്ളി: ദക്ഷിണ രാജ്യങ്ങള്ക്ക് സുരക്ഷിതവും വിശ്വസനീയവുമായ നിര്മിത ബുദ്ധി ഉറപ്പാക്കുക എന്ന ലക്ഷ്യത്തോടെ അമൃത വിശ്വവിദ്യാപീഠത്തിലെ അമൃത എഐ സേഫ്റ്റി റിസര്ച്ച് ലാബ് ‘സേഫ് എഐ ഫോര് ദി ഗ്ലോബല് സൗത്ത്’ എന്ന പേരില് സംഘടിപ്പിച്ച എഐ സേഫ്റ്റി കോണ്ക്ലേവിന്റെ വേദിയില് വച്ച് ധവളപത്രം പുറത്തിറക്കി.
പ്രിന്സിപ്പല്സ് ഫോര് എത്തിക്കല് ആന്ഡ് സെയ്ഫ് ഏജന്റിക് എഐ ഓര്ക്കസ്ട്രഷന് എക്രോസ്സ് ഇന്ഫ്രാസ്ട്രക്ച്ചര് ഗ്രേഡിയന്റ്സ് സേഫ്റ്റി ഗൈഡ്ലൈന്സ് ഫോര് ക്രിട്ടിക്കല് സെക്ടേഴ്സ് ഇന് ഇന്ത്യ ആന്ഡ് ദി ഗ്ലോബല് സൗത്ത് ധവളപത്രമാണ് പുറത്തിറക്കിയത്. കേന്ദ്ര ഐടി മന്ത്രാലയം സംഘടിപ്പിക്കുന്ന 2026ലെ ഇന്ത്യ എഐ ഇംപാക്ട് സമ്മിറ്റിന്റെ മുന്നോടിയായി സംഘടിപ്പിച്ച കോണ്ക്ലേവില് കേന്ദ്ര ഐടി മന്ത്രാലയം അഡീഷണല് സെക്രട്ടറിയും ഇന്ത്യ എഐ മിഷന് സിഇഒയുമായ അഭിഷേക് സിങ്, യുനെസ്കോ അസി.ഡയറക്ടര് ജനറല് ഗബ്രിയേല റാമോസ്, മൗറീഷ്യസ് ഐസിടി മന്ത്രി ഡോ. അവിനാഷ് രാംതോഹുല്, എന്പിഒഎല് -ഡിആര്ഡിഒ ഡയറക്ടറും ശാസ്ത്രജ്ഞനുമായ ഡോ. ഡി.ശേഷഗിരി എന്നിവര് മുഖ്യാതിഥികളായി.
സര്വകലാശാലയുടെ ചാന്സലര് കൂടിയായ മാതാ അമൃതാനന്ദമയി ദേവി ചടങ്ങില് പങ്കെടുത്തവരെ വീഡിയോസന്ദേശത്തിലൂടെ അഭിസംബോധന ചെയ്തു. സര്വകലാശാലാ പ്രൊ വൈസ്ചാന്സലര് ഡോ. മനീഷ വി രമേഷ്, ഡീന് ഡോ. കൃഷ്ണശ്രീ അച്യുതന്, എഞ്ചിനീയറിങ് വിഭാഗം അസോസിയേറ്റ് ഡീന് ഡോ. എസ് എന് ജ്യോതി, പ്രൊഫസര് ഡോ. ശിവരാമകൃഷ്ണന് എന്നിവര് പങ്കെടുത്തു.
കോണ്ക്ലേവിന്റെ ഭാഗമായി ആരോഗ്യം, വിദ്യാഭ്യാസം, ബാങ്കിങ് തുടങ്ങിയ മേഖലകളില് എഐ ഇക്കോസിസ്റ്റം കെട്ടിപ്പടുക്കുന്നതിനെക്കുറിച്ചും, എഐ സുരക്ഷ, നൈതികത എന്നിവയെക്കുറിച്ചും വിദഗ്ദ്ധരുടെ സാന്നിധ്യത്തില് പാനല് ചര്ച്ചകള് സംഘടിപ്പിച്ചു. ഹൈബ്രിഡ് രീതിയില് നടന്ന കോണ്ക്ലേവില് മുന്നൂറോളം പേരാണ് പങ്കെടുത്തത്.
