ന്യൂദൽഹി: ലോക്‌സഭയിലെ കോൺഗ്രസ് നേതാവ് രാഹുൽ ഇപ്പോൾ ജർമ്മനി സന്ദർശനത്തിലാണ്. ജർമ്മനി സന്ദർശന വേളയിൽ രാഹുൽ ബിഎംഡബ്ല്യു വെൽറ്റ് (ബിഎംഡബ്ല്യുവിന്റെ പ്രദർശന കേന്ദ്രം), മ്യൂണിക്കിലെ ബിഎംഡബ്ല്യു പ്ലാന്റ് എന്നിവ സന്ദർശിച്ചു. തുടർന്ന് ശക്തമായ സമ്പദ്‌വ്യവസ്ഥകളുടെ നട്ടെല്ലാണ് ഉൽപ്പാദനമെന്നും എന്നാൽ ഇന്ത്യയിൽ ഉൽപ്പാദനം കുറയുകയാണ്. വലിയ തോതിൽ ഉയർന്ന നിലവാരമുള്ള തൊഴിലവസരങ്ങൾ സൃഷ്ടിക്കുകയും വേണമെന്നും രാഹുൽ ഗാന്ധി പറഞ്ഞു. തുടർന്ന് രാഹുലിന്റെ ഈ പ്രസ്താവനയെ വിമർശിച്ച് മുതിർന്ന ബിജെപി നേതാക്കൾ രംഗത്തെത്തി.
രാഹുൽ വിദേശത്ത് ഇന്ത്യയെ അപമാനിക്കുന്നു
പ്രതിപക്ഷ നേതാവിന് വലിയ ഉത്തരവാദിത്തമുണ്ടെന്ന് ബിജെപി എംപി സാംബിത് പത്ര പറഞ്ഞു. പ്രത്യേകിച്ച് വിദേശത്ത് ആയിരിക്കുമ്പോൾ അദ്ദേഹം ഉത്തരവാദിത്തത്തോടെ പെരുമാറണം. പാർലമെന്റ് സമ്മേളനത്തിലാണ്, നിരവധി ബില്ലുകൾ സഭയിൽ ചർച്ച ചെയ്യപ്പെടുന്നു, ഇന്ത്യൻ സമൂഹത്തെ അഭിസംബോധന ചെയ്യാൻ രാഹുൽ ജർമ്മനിയിലേക്ക് പോയിട്ടുണ്ട്. ഇന്ന് രാഹുൽ ഗാന്ധി മ്യൂണിക്കിലെ ബിഎംഡബ്ല്യു ഫാക്ടറി സന്ദർശിച്ചു, അവിടെ അവരുടെ നിർമ്മാണത്തെ പ്രശംസിക്കുകയും ഇന്ത്യയിലെ നിർമ്മാണം മോശമാണെന്ന് ദുഃഖം പ്രകടിപ്പിക്കുകയും ചെയ്തു എന്ന് പത്ര പറഞ്ഞു.
പതിവ് വിദേശ യാത്രകളും വിദേശ മണ്ണിൽ നിന്ന് ഇന്ത്യയെ അപമാനിക്കുന്നതും രാഹുൽ ഗാന്ധിക്കും കോൺഗ്രസ് പാർട്ടിക്കും ഇന്ത്യയോടുള്ള വികാരം പ്രകടമാക്കുന്നുണ്ടെന്നും അദ്ദേഹം പറഞ്ഞു. കൂടാതെ രാഹുലും ഉത്തരവാദിത്തവും ഒരുമിച്ച് പോകില്ല. വിദേശ യാത്ര ചെയ്യുമ്പോഴെല്ലാം അദ്ദേഹം പാർലമെന്റിനെയും ഇന്ത്യയെയും അപമാനിക്കുന്നുവെന്നും ബിജെപി എംപി കുറ്റപ്പെടുത്തി.
