കോഴിക്കോട്: സൂപ്പര് ലീഗ് കേരള രണ്ടാം സീസണില് കണ്ണൂര് വാരിയേഴ്സിന്റെ ഫൈനല് പ്രവേശനത്തിന് കളമൊരുക്കിയത് അവരുടെ ഗോളി അല്കേഷ് രാജിന്റെ മിന്നുന്ന പ്രകടനവും പ്രതിരോധനിരയുടെ ഉജ്വല പ്രകടനവും. ഞായറാഴ്ച കോഴിക്കോട് കോര്പ്പറേഷന് സ് സ്റ്റേഡിയത്തില് നടന്ന ആദ്യ സെമിയില് ആതിഥേയരായ കാലിക്കറ്റ് എഫ്സിയെ ഏകപക്ഷീയമായ ഒരു ഗോളിന് കീഴടക്കിയാണ് കണ്ണൂര് വാരിയേഴ്സ് ചാമ്പ്യന്ഷിപ്പിന്റെ തങ്ങളുടെ ആദ്യ ഫൈനലിന് അര്ഹത നേടിയത്. പെനാല്റ്റിയിലൂടെ അണ്ടര് 23 താരം കണ്ണൂര്ക്കാരന് മുഹമ്മദ് സിനാനാണ് വിജയഗോള് നേടിയത്. സിനാന്റെ സീസണിലെ നാലാം ഗോളായിരുന്നു ഇത്.
ഇതോടെ സൂപ്പര് ലീഗില് എല്ലാ ടീമുകളെയും പരാജയപ്പെടുത്തുന്ന രണ്ടാമത്തെ ടീമായി കണ്ണൂര് വാരിയേഴ്സ് മാറി.
കഴിഞ്ഞ സീസണിലെ അതേ പരിശീലകന് മാനുവല് സാഞ്ചസിനെ ഈ സീസണിലും നിലനിര്ത്തിയാണ് വാരിയേഴ്സ് ഇത്തവണ ഇറങ്ങിയത്. ആക്രമണാത്മക ഫുട്ബോളിന് മുന്തൂക്കം നല്കുന്ന രീതിയിലാണ് മൈതാനങ്ങളില് താരങ്ങളെ വിന്യസിച്ചിരുന്നതെങ്കിലും ഒപ്പം പ്രതിരോധത്തിനും മികച്ച മുന്തൂക്കം നല്കിയിരുന്നു. മാനുവല് സാഞ്ചസിന്റെ ഈ തന്ത്രങ്ങളാണ് വാരിയേഴ്സിനെ തുടര്ച്ചയായ രണ്ട് തവണ സെമിയിലും ആദ്യ ഫൈനലിലും എത്തിച്ചത്. അതോടൊപ്പം രണ്ട് സീസണിലും എവേ മത്സരങ്ങളില് ഒന്നു പോലും തോറ്റിട്ടില്ലെന്ന അപൂര്വ റക്കാര്ഡും സാഞ്ചസിനും വാരിയേഴ്സും സ്വന്തമായി.
ഈ സീസണില് അഞ്ച് ഹോം മത്സരങ്ങളില് ഒന്നില്പോലും ജയിക്കാന് കഴിയാതിരുന്ന ടീമിന് അത്മവിശ്വാസം നല്കി ഗ്രൂപ്പ് ഘട്ടത്തിലെ അവസാന മത്സരത്തില് തൃശൂര് മാജികിനെ തകര്ത്ത് സെമി ഫൈനല് സാധ്യത നിലനിര്ത്തി. കാലിക്കറ്റ് തിരുവനന്തപുരത്തെ തോല്പ്പിച്ചതോടെ സെമിയിലേക്ക് യോഗ്യത നേടി. സെമിയില് ടൂര്ണമെന്റിലെ ശക്തരായ കാലിക്കറ്റ് എഫ്സിക്കെതിരെ ഇറങ്ങുമ്പോള് കൃത്യമായ പദ്ധതി പരിശീലകന് ഉണ്ടായിരുന്നു. നാല് വിദേശ താരങ്ങള്ക്ക് കളിക്കാവുന്ന ടൂര്ണമെന്റില് മൂന്ന് പേരെ മാത്രം ആദ്യ ഇലവനില് ഉള്പ്പെടുത്തി. അണ്ടര് 23 താരങ്ങള് രണ്ട് പേര് നിര്ബന്ധമായ ലീഗില് നിര്ണായക മത്സരത്തില് മൂന്ന് പേരെ ഇറക്കി. കാലിക്കറ്റ് എഫ്സിയുടെ ശക്തി ദൗര്ബല്യങ്ങള് ശരിക്കറിയാവുന്ന കോച്ചിന്റെ തന്ത്രമായിരുന്നു ഇത്.
സീസണില് സ്വന്തം മൈതാനത്ത് ഏറെ വിമര്ശനം നേരിട്ട കണ്ണൂര് വാരിയേഴ്സിന്റെ പ്രതിരോധം സെമിയില് കാലിക്കറ്റിനെ കോട്ടകെട്ടി പ്രതിരോധിച്ചു. ലീഗ് മത്സരങ്ങളില് മാത്രം 21 ഗോള് നേടി കാലിക്കറ്റിന് കണ്ണൂര് വലകുലുക്കാന് സാധിച്ചില്ല. പാറപോലെ ഉറച്ചു നിന്ന് നിക്കോളാസും വികാസും നയിക്കുന്ന പ്രതിരോധ നിര. സച്ചിന് സുനില്, മനോജ്, പകരക്കാരനായി ഇറങ്ങിയ അശ്വിന്കുമാര് എന്നിവരായിരുന്നു പ്രതിരോധത്തില് മിന്നിയ മറ്റ് താരങ്ങള്. അജ്സലും പ്രശാന്തും അടക്കമുള്ള കാലിക്കറ്റിന്റെ താരനിര പൊളിച്ചപ്പോഴും അവര്ക്ക് മുന്നില് ബാലികേറാമലയായി അല്കേഷ് നിലയുറപ്പിച്ചു.
