ന്യൂദല്ഹി: പത്ത് സംസ്ഥാനങ്ങളില് പുതിയ ആശുപത്രികളും ഡിസ്പെന്സറികളും സ്ഥാപിച്ച് ആരോഗ്യ സംരക്ഷണ അടിസ്ഥാന സൗകര്യങ്ങള് വര്ധിപ്പിക്കാന് എംപ്ലോയീസ് സ്റ്റേറ്റ് ഇന്ഷുറന്സ് കോര്പറേഷന്. കേന്ദ്ര തൊഴില് വകുപ്പ് മന്ത്രി ഡോ. മന്സൂഖ് മാണ്ഡവ്യയുടെ അധ്യക്ഷതയില് ചേര്ന്ന 197-ാമത് ബോര്ഡ് യോഗത്തിലാണ് തീരുമാനം. ഇഎസ്ഐസിയുടെ പ്രവര്ത്തനം വ്യാപിപ്പിക്കുന്നതിനും അടിസ്ഥാന സൗകര്യങ്ങള് നവീകരിക്കുന്നതിനും സേവന വിതരണം മെച്ചപ്പെടുത്തുന്നതിനും ഉദ്ദേശിച്ചുള്ള നിരവധി സുപ്രധാന നിര്ദേശങ്ങളും യോഗം അംഗീകരിച്ചു.
മേഘാലയയിലെ ഷില്ലോങ്, മഹാരാഷ്ട്രയിലെ ഔറംഗാബാദ്, രാജസ്ഥാനിലെ നീംറാണ, തമിഴ്നാട് നാഗര്കോവില്, ഹരിയാനയിലെ ഹിസാര്, സോനിപ്പത്ത്, കര്ണാല്, ഉത്തര്പ്രദേശിലെ ഗ്രേറ്റര് നോയിഡ, ഒഡീഷയിലെ ബെര്ഹാംപൂര്, ബാലസോര്, തെലങ്കാന രംഗറെഡ്ഡിയിലെ ഷംഷാബാദ്, പഞ്ചാബിലെ ലാല്രു എന്നിവിടങ്ങളിലാണ് 100 മുതല് 350 വരെ കിടക്കകളുള്ള ആശുപത്രികള്ക്ക് സ്ഥലമേറ്റെടുക്കാന് അനുമതിയായത്. നിലവില് പ്രവര്ത്തിക്കുന്ന ചില ആശുപത്രികളില് സൗകര്യം വര്ധിപ്പിക്കാനും സ്ഥലം ഏറ്റെടുക്കുന്നുണ്ട്. ഇതുകൂടാതെ വിവിധ സംസ്ഥാനങ്ങളില് ഡിസ്പെന്സറികള് സ്ഥാപിക്കുന്നതിന് സ്ഥലം ഏറ്റെടുക്കാനുള്ള തീരുമാനത്തിനും യോഗം അംഗീകാരം നല്കി.
2024-25ലെ കോര്പറേഷന്റെ വാര്ഷിക അക്കൗണ്ടുകള്, കംപ്ട്രോളര് ആന്ഡ് ഓഡിറ്റര് ജനറലിന്റെ റിപ്പോര്ട്ട്, 2024-25ലെ ഇഎസ്ഐ കോര്പറേഷന്റെ വാര്ഷിക റിപ്പോര്ട്ട്, 2025-26 ലെ പുതുക്കിയ എസ്റ്റിമേറ്റ്, 2026-2027 ലെ ബജറ്റ് എസ്റ്റിമേറ്റ് എന്നിവയും യോഗം അംഗീകരിച്ചു. ഭാരതത്തിലുടനീളമുള്ള 779ല് 713 ജില്ലകളും ഇഎസ്ഐ സ്കീമിന് കീഴില് വരുന്നു. നിലവില്, 83,11,341 സ്ത്രീകള് ഉള്പ്പെടെ 3.84 കോടി പേര് സ്കീമില് ഇന്ഷുര് ചെയ്തവരാണ്. 14.91 കോടി ഗുണഭോക്താക്കള് ഇഎസ്ഐസിക്കുണ്ട്.
കേന്ദ്രസഹമന്ത്രി ശോഭാ കരന്ദ്ലാജെ, ഡോള സെന് എംപി, വകുപ്പ് സെക്രട്ടറി വന്ദന ഗുര്നാനി, ഇഎസ്ഐസി ഡയറക്ടര് ജനറല് അശോക് കുമാര് സിങ്, സംസ്ഥാന സര്ക്കാരുകളുടെ പ്രിന്സിപ്പല് സെക്രട്ടറിമാര്/സെക്രട്ടറിമാര്, തൊഴിലുടമകളുടെയും ജീവനക്കാരുടെയും പ്രതിനിധികള് എന്നിവരും യോഗത്തില് പങ്കെടുത്തു.
