ആലപ്പുഴ: ദേശീയപാത വികസനത്തിന്റെ ഭാഗമായി ജില്ലയില് ഏറ്റെടുത്തത് തിരുവിതാംകൂര് ദേവസ്വം ബോര്ഡ് വക 17 ക്ഷേത്രങ്ങളുടെ ഭൂമിയും കെട്ടിടങ്ങളും. ആകെ 27.01 കോടി രൂപയാണ് നഷ്ടപരിഹാരമായി നല്കിയത്. ഭൂമി വില സംസ്ഥാന സര്ക്കാരിനും കെട്ടിടത്തിന്റെ വില ദേവസ്വം ബോര്ഡിനുമാണ് നല്കിയിട്ടുള്ളത്. ക്ഷേത്രങ്ങള്ക്ക് താന്ത്രിക ചടങ്ങുകള് നടത്തുന്നതിനും, പുന:പ്രതിഷ്ഠ തുടങ്ങിയ ചടങ്ങുകള് നടത്തുന്നതിനും
പ്രത്യേകമായി തുക അനുവദിച്ചിട്ടില്ലെന്നും ദേശീയപാത ലാന്ഡ് അക്വിസിഷന് വിഭാഗം, വിവരാവകാശ നിയമപ്രകാരം വിഎച്ച്പി സംസ്ഥാന ജനറല് സെക്രട്ടറി അഡ്വ. അനി
ല് വിളയിലിന് നല്കിയ മറുപടിയില് വ്യക്തമാക്കുന്നു.
ജില്ലയില് അരൂര് മുതല് കൃഷ്ണപുരം വരെയാണ് ദേവസ്വം ബോര്ഡിന്റെ 17 ക്ഷേത്രഭൂമികളും കെട്ടിടങ്ങളും ഏറ്റെടുത്തത്. അമ്പലപ്പുഴയിലെ ഇരട്ടക്കുളങ്ങര മഹാദേവ ക്ഷേത്രത്തിനാണ് ഏറ്റവും കൂടുതല് നഷ്ടപരിഹാരം അനുവദിച്ചത്. 7.767 കോടി രൂപ. വണ്ടാനം ശ്രീധര്മശാസ്താ ക്ഷേത്രത്തിന് 3.59 കോടിയും, നീര്ക്കുന്നം ശ്രീശങ്കരനാരായണ ക്ഷേത്രത്തിന് 4.49 കോടിയും അനുവദിച്ചു. ചെറിയ കലവൂര് ക്ഷേത്രം-60.24 ലക്ഷം, വലിയകലവൂര് ക്ഷേത്രം-1.23 കോടി, പുറക്കാട് ആനന്ദേശ്വരം ക്ഷേത്രം-33.25 ലക്ഷം, ഉറിയരി ഉണ്ണിത്തേവര് ക്ഷേത്രം-72.90 ലക്ഷം, നവരാക്കല് ക്ഷേത്രം- 1.24 കോടി, കാഞ്ഞൂര് ക്ഷേത്രം-2.41 കോടി, ഹരിപ്പാട് സുബ്രഹ്മണ്യസ്വാമി ക്ഷേത്രം-7.38 ലക്ഷം, കൃഷ്ണപുരം ശ്രീകൃഷ്ണക്ഷേത്രം-1.13 കോടി, പള്ളിപ്പാട് ശ്രീകൃഷ്ണക്ഷേത്രം-7.44 ലക്ഷം, പുറക്കാട് മുരിക്കുവേലി ക്ഷേത്രം-1.02 കോടി, പട്ടണക്കാട് മഹാദേവ ക്ഷേത്രം-1.11 കോടി, തുറവൂര് മഹാക്ഷേത്രം-38. 42 ലക്ഷം, കീരിക്കാട് രാമപുരം ക്ഷേത്രം -24.72 ലക്ഷം രൂപ, കുമാരപുരം തിരുവിലഞ്ഞാല് ദേവീ ക്ഷേത്രത്തിന് ഭൂമിക്ക് 53.25 ലക്ഷവും, കെട്ടിടത്തിന് നഷ്ടപരിഹാരമായി 1.21 ലക്ഷം രൂപയുമാണ് അനുവദിച്ചത്. ഇതില് രാമപുരം ക്ഷേത്രത്തിന്റെ തുക തര്ക്കമുള്ളതിനാല് ജില്ലാ കോടതിയിലാണ് കെട്ടിവച്ചിരിക്കുന്നത്.
എന്നാല് ഇത്രയും വലിയ തുക നഷ്ടപരിഹാരമായി സര്ക്കാരിനും ദേവസ്വം ബോര്ഡിനും ലഭിച്ചിട്ടും ക്ഷേത്രങ്ങളുടെ വികസനത്തിനായി ഒരു രൂപ പോലും ചെലവഴിച്ചിട്ടില്ല. ഭൂമി ഏറ്റെടുത്ത ക്ഷേത്രങ്ങള് മതില് കെട്ടി സംരക്ഷിക്കാന് പോലും തയ്യാറായിട്ടില്ല. പല ക്ഷേത്രങ്ങളുടെയും നിലവിലെ കെട്ടിടങ്ങള് പലതും അത്യന്തം ശോചനീയാവസ്ഥയിലാണ്. ക്ഷേത്രങ്ങളുടെ വികസന, സംരക്ഷണ പ്രവര്ത്തനങ്ങള് നടത്താന് സാമ്പത്തിക പ്രതിസന്ധിയുണ്ടെന്ന പതിവു പല്ലവി ആവര്ത്തിക്കുകയാണ് ദേവസ്വം ബോര്ഡ്.
ജില്ലയില് ഏറ്റവും കൂടുതല് നഷ്ടപരിഹാരം ലഭിച്ച ഇരട്ടക്കുളങ്ങര ക്ഷേത്രത്തിന്റെ അവസ്ഥ ദയനീയമാണ്. ദേശീയപാതയോരത്തെ ക്ഷേത്രക്കുളം മലിനമാണ്. സംരക്ഷണ ഭിത്തിയുമില്ല. മതില് കെട്ടി സംരക്ഷിക്കാനും നടപടിയില്ല. മീന് വണ്ടികളില് നിന്നുള്ള മലിനജലം ക്ഷേത്രക്കുളത്തിലേക്ക് ഒഴുക്കുന്നതായും പരാതികള് ഉയരുന്നു.
