കൊച്ചി: നടി ആക്രമിക്കപ്പെട്ട കേസിൽ നടൻ ദിലീപിനെ എറണാകുളം പ്രിൻസിപ്പൽ സെഷൻസ് കോടതി കുറ്റവിമുക്തനാക്കിയതിന് പിന്നാലെ, ചലച്ചിത്രതാരങ്ങളുടെ സംഘടനയായ ‘അമ്മ’ (AMMA) ഔദ്യോഗിക പ്രതികരണവുമായി രംഗത്തെത്തി. “നിയമം നീതിയുടെ വഴിക്ക് നീങ്ങട്ടെ. ‘അമ്മ’ കോടതിയെ ബഹുമാനിക്കുന്നു,” എന്ന കുറിപ്പോടെയാണ് സംഘടന തങ്ങളുടെ നിലപാട് ഫേസ്ബുക്കിൽ കുറിച്ചത്.
അതേസമയം, രമ്യ നമ്പീശൻ, റിമ കല്ലിങ്കൽ, പാർവതി തുടങ്ങിയ താരങ്ങൾ ‘അവൾക്കൊപ്പം’ എന്ന പോസ്റ്റർ ഫേസ്ബുക്കിൽ പങ്കുവെച്ച് അതിജീവിതയ്ക്ക് ഐക്യദാർഢ്യം പ്രഖ്യാപിച്ചു. നടിയെ തട്ടിക്കൊണ്ടുപോയി ബലാത്സംഗം ചെയ്ത കേസിൽ നടൻ ദിലീപിനെ എറണാകുളം സെഷൻസ് കോടതി വെറുതെ വിട്ടു. എന്നാൽ, ഒന്നാം പ്രതി പൾസർ സുനി ഉൾപ്പെടെ ആറ് പ്രതികൾ കുറ്റക്കാരാണെന്ന് കോടതി കണ്ടെത്തി. ഇവർക്കുള്ള ശിക്ഷ ഡിസംബർ 12‑ന് വിധിക്കും.
