കണ്ണൂര്‍: ഡിഗ്രി വിദ്യാഭ്യാസ കാലഘട്ടത്തില്‍ കണ്ണൂര്‍ എസ്എന്‍ കോളജില്‍ വിദ്യാര്‍ത്ഥി യൂണിയന്‍ വൈസ് ചെയര്‍പേഴസണ്‍മാരായി വിജയിച്ച മൂന്നുപേര്‍ കണ്ണൂര്‍ കോര്‍പറേഷനില്‍ എന്‍ഡിഎ സ്ഥാനാര്‍ത്ഥികളായി മത്സരരംഗത്ത്. പി. ജയലത, അധ്യാപികമാരായ എം.പി. രാഗിണി, ശ്രീസുമ വിനോദ് എന്നിവരാണവര്‍. കോളജു കാലത്ത് കെഎസ്‌യുവിന്റെ പ്രവര്‍ത്തനത്തില്‍ സജീവമായിരുന്ന മൂന്നുപേരും ഇപ്പോള്‍ സജീവ ബിജെപി പ്രവര്‍ത്തകരാണ്.
1983-84 വര്‍ഷമാണ് എം.പി. രാഗിണി കോളജ് യൂണിയന്‍ വൈസ് ചെയര്‍ പേഴ്‌സണായത്. 1984-85 വര്‍ഷം ശ്രീസുമ വിനോദും 1987-88 വര്‍ഷം പി. ജയലതയും വൈസ് ചെയര്‍പേഴ്‌സണ്‍മാരായി. കോളജ് കാലം കഴിഞ്ഞ് വിവാഹിതരായി വിവിധയിടങ്ങളില്‍ താമസം മാറിയെങ്കിലും ഹൃദ്യമായബന്ധം നിലനിര്‍ത്തി. രാഗിണിയും ശ്രീസുമ വിനോദും ഒന്നിച്ചാണ് മാലിദ്വീപില്‍ അധ്യാപകരായത്. മൂന്നുപേരും ബിജെപിയില്‍ ചേര്‍ന്നതും ഒന്നിച്ച്.
മഹിളാമോര്‍ച്ച കണ്ണൂര്‍ നോര്‍ത്ത് ജില്ലാ പ്രസിഡന്റാണ് പി. ജയലത. കണ്ണൂര്‍ കോര്‍പ്പറേഷന്‍ കിഴുന്ന വാര്‍ഡിലാണ് മത്സരിക്കുന്നത്. നേരത്തെ ജില്ലാ പഞ്ചായത്തിലും കണ്ണൂര്‍ കോര്‍പ്പറേഷനിലും മത്സരിച്ചിരുന്നു. ഭര്‍ത്താവ്: വിനോദ്കുമാര്‍, മക്കള്‍: അന്വത വിനോദ്കുമാര്‍, അദ്വജ വിനോദ് കുമാര്‍.
മുണ്ടയാട് ഡിവിഷനില്‍ മത്സരിക്കുന്ന രാഗിണി ടീച്ചര്‍ ബിജെപി കണ്ണൂര്‍ നോര്‍ത്ത് ജില്ലാ വൈസ് പ്രസിഡന്റാണ്. ദീര്‍ഘകാലം ചിന്മയാ ബാലഭവനില്‍ അധ്യാപികയായിരുന്നു. 12 വര്‍ഷം മാലയിലുള്ള സ്‌കൂളിലും അധ്യാപികയായി സേവനമനുഷ്ഠിച്ചു. മഹിളാ ഐക്യവേദി സംസ്ഥാന വര്‍ക്കിംഗ് പ്രസിഡന്റായിരുന്നു. ലഹരിക്കെതിരായ കൂട്ടായ്‌മയായ മദേഴ്‌സ് ആര്‍മിയുടെ പ്രവര്‍ത്തനത്തിലൂടെ സമൂഹത്തിന്റെ നാനാഭാഗത്തും ശ്രദ്ധേയമായ സാന്നിദ്ധ്യമായി. സേവാഭാരതി എളയാവൂര്‍ ഏരിയയുടെ പ്രവര്‍ത്തനത്തില്‍ ദീര്‍ഘകാലമായി സജീവമാണ്. പ്രവാസി ക്ഷേമസമിതിയുടെയും സങ്കല്‍പ് ഐഎഎസ് അക്കാദമിയുടെയും എക്‌സിക്യൂട്ടീവ് കമ്മറ്റിയംഗമാണ്. ഭര്‍ത്താവ്: ടി.വി. മോഹന്‍കുമാര്‍. മക്കള്‍: സുമിതമോഹന്‍, നവനീത് കൃഷ്ണമോഹന്‍.
മഹിളാ ഐക്യവേദി ജില്ലാ ജനറല്‍ സെക്രട്ടറിയായിരുന്ന ശ്രീസുമ വിനോദ് പഞ്ഞിക്കല്‍ ഡിവിഷനിലെ എന്‍ഡിഎ സ്ഥാനാര്‍ത്ഥിയാണ്. നേരത്തെ പഞ്ഞിക്കല്‍ വാര്‍ഡ് മെമ്പറായിരുന്നു. ബെംഗളൂരുവില്‍ സെന്റ് മേരീസ് കോണ്‍വെന്റ് സ്‌കൂളില്‍ 12 വര്‍ഷം അധ്യാപികയായിരുന്നു. തുടര്‍ന്ന് മാല ദ്വീപില്‍ 12 വര്‍ഷം അധ്യാപികയായി. ഭര്‍ത്താവ്: വിനോദ്. മക്കള്‍ ഡോ. അനേക. വിവേക, ധനേക.
ജന്മഭൂമി ഓണ്‍ലൈന്‍