പഞ്ച്കുള (ഹരിയാന): ഇന്ത്യ ഇന്റര്‍നാഷണല്‍ സയന്‍സ് ഫെസ്റ്റിവലിന്റെ 11-ാം പതിപ്പിന് ഹരിയാനയിലെ പഞ്ച്കുളയില്‍ തുടക്കം. കേന്ദ്ര ശാസ്ത്ര സാങ്കേതിക വകുപ്പ് മന്ത്രി ഡോ. ജിതേന്ദ്ര സിങ് ഉദ്ഘാടനം ചെയ്തു. ആഘോഷം, ആശയവിനിമയം, കരിയര്‍ എന്നീ മൂന്ന് സി’കളെ അടിസ്ഥാനമാക്കിയാണ് ഇന്ത്യ ഇന്റര്‍നാഷണല്‍ സയന്‍സ് ഫെസ്റ്റിവലിനെ രൂപപ്പെടുത്തുന്നതെന്ന് ഡോ. ജിതേന്ദ്ര സിങ് പറഞ്ഞു.
ഭാരതത്തിന്റെ ശാസ്ത്രപുരോഗതി ലബോറട്ടറികള്‍ക്കപ്പുറത്തേക്ക് വ്യാപിക്കണം. പൗരന്മാരെയും വിദ്യാര്‍ത്ഥികളെയും യുവപ്രൊഫഷണലുകളെയും അര്‍ത്ഥവത്തായ രീതിയില്‍ ഇതിന്റെ ഭാഗമാക്കണമെന്നും മന്ത്രി പറഞ്ഞു. ഭാരതത്തില്‍ ശാസ്ത്ര മേഖലയിലെ സ്വാശ്രയത്വം ഇനി അഭിലാഷമല്ലെന്നും വിവിധ മേഖലകളില്‍ കൈവരിച്ച നേട്ടങ്ങള്‍ ഉയര്‍ത്തിക്കാട്ടി മന്ത്രി പറഞ്ഞു.
ശാസ്ത്ര-സാങ്കേതികവിദ്യ-പ്രതിരോധ-ബഹിരാകാശ പ്രദര്‍ശനവും സയന്‍സ് ഓണ്‍ എ സ്ഫിയര്‍’ ഇന്‍സ്റ്റലേഷനും മന്ത്രി ഉദ്ഘാടനം ചെയ്തു. അന്റാര്‍ട്ടിക്കയിലെ ഭാരത ഗവേഷണ കേന്ദ്രമായ ഭാരതിയിലെ ഗവേഷകരുമായി അദ്ദേഹം തത്സമയം സംവദിച്ചു. ധ്രുവ സാഹചര്യങ്ങളില്‍ നടക്കുന്ന ശാസ്ത്ര പ്രവര്‍ത്തനങ്ങള്‍ അവലോകനം ചെയ്തു.
നിതി ആയോഗ് അംഗങ്ങളായ ഡോ. വി.കെ. സാരസ്വത്, വി.കെ. പോള്‍, പ്രിന്‍സിപ്പല്‍ സയന്റിഫിക് അഡൈ്വസര്‍ പ്രൊഫ. എ.കെ. സൂദ്, ഭൗമശാസ്ത്ര മന്ത്രാലയം സെക്രട്ടറി ഡോ. എം. രവിചന്ദ്രന്‍, സിഎസ്ഐആര്‍ ഡയറക്ടര്‍ ജനറല്‍ ഡോ. എന്‍. കലൈസെല്‍വി, വിജ്ഞാന്‍ ഭാരതി ദേശീയ പ്രസിഡന്റ് ഡോ. ശേഖര്‍ മാണ്ഡെ, ഐഐടിഎം പൂനെ ഡയറക്ടര്‍ ഡോ. എ. സൂര്യചന്ദ്രറാവു തുടങ്ങിയവരും മുതിര്‍ന്ന ഉദ്യോഗസ്ഥരും ശാസ്ത്രജ്ഞരും ചടങ്ങില്‍ പങ്കെടുത്തു.
ഭാരതത്തിന്റെ ശാസ്ത്ര പുരോഗതി, സ്വയംപര്യാപ്തത, അറിവ്, പാരമ്പര്യം എന്നിവ പ്രദര്‍ശിപ്പിക്കുന്ന സയന്‍സ് ഫെസ്റ്റിവല്‍ സ്വയംപര്യാപ്ത ഭാരതത്തിനായി വിജ്ഞാനത്തിലൂടെ സമൃദ്ധി എന്ന പ്രമേയത്തെ അടിസ്ഥാനമാക്കിയാണ് സംഘടിപ്പിക്കുന്നത്.
കേന്ദ്രസര്‍ക്കാരിന്റെ വിവിധ മന്ത്രാലയങ്ങളും വിജ്ഞാന്‍ഭാരതിയും സംയുക്തമായാണ് സയന്‍സ് ഫെസ്റ്റിവല്‍ സംഘടിപ്പിക്കുന്നത്. 9ന് സമാപിക്കും.
