കൊളംബോ: ഡിറ്റ് വാ ചുഴലിക്കാറ്റില്‍ ദുരിതമനുഭവിക്കുന്നവര്‍ക്കായി ‘ഓപ്പറേഷന്‍ സാഗര്‍ ബന്ധു’ എന്ന പേരില്‍ ഭാരതം ശ്രീലങ്കയില്‍ നടത്തുന്ന മാനുഷിക സഹായ ശ്രമങ്ങള്‍ ഊര്‍ജിതമാക്കി. ഭാരത വ്യോമസേനയുടെ സി-17 ട്രാന്‍സ്‌പോര്‍ട്ട് വിമാനം ഹിന്ദനില്‍ നിന്ന് കൊളംബോയിലേക്ക് 65 ടണ്‍ ഭാരമുള്ള ബെയ്‌ലി പാലം എയര്‍ലിഫ്റ്റ് ചെയ്തു.
500 ജലശുദ്ധീകരണ യൂണിറ്റുകളും എത്തിച്ചു. വെള്ളപ്പൊക്കത്തില്‍ വേര്‍പിരിഞ്ഞ പ്രദേശങ്ങളെ വീണ്ടും ബന്ധിപ്പിക്കുന്നതിന് സാധാരണയായി ഉപയോഗിക്കുന്ന, കൊണ്ടുനടക്കാവുന്ന, മുന്‍കൂട്ടി നിര്‍മിച്ച മോഡുലാര്‍ ഘടനയാണ് ബെയ്‌ലി പാലം. ബെയ്‌ലി പാലം സ്ഥാപിക്കുന്നതിനായി വിദഗ്ധ എന്‍ജിനീയര്‍മാരും നേരത്തെ വിന്യസിച്ചിരുന്ന ഫീല്‍ഡ് ആശുപത്രിയെ സഹായിക്കാന്‍ ഒരു മെഡിക്കല്‍ സംഘവും ഉള്‍പ്പെടെ 22 ഉദ്യോഗസ്ഥരെയും ഭാരതം ശ്രീലങ്കയിലേക്ക് അയച്ചിട്ടുണ്ട്.
ഡിറ്റ് വാ ചുഴലിക്കാറ്റില്‍ ശ്രീലങ്കയില്‍ മരിച്ചവരുടെ എണ്ണം 479 ആയി ഉയര്‍ന്നു. വെള്ളപ്പൊക്കവും മണ്ണിടിച്ചിലുമുള്‍പ്പെടെയുള്ള പ്രതികൂല കാലാവസ്ഥ കാരണം 350 ഓളം പേരെ കാണാതായിട്ടുണ്ട്.
