ന്യൂദല്ഹി: പുടിന്റെ ഇന്ത്യാസന്ദര്ശനത്തെ പരോക്ഷമായി വിമര്ശിക്കുന്ന രീതിയിലുള്ള പരാമര്ശവുമായി ഇന്ത്യയില് ജോലി ചെയ്യുന്ന മൂന്ന് വിദേശപ്രതിനിധികള് ലേഖനമെഴുതിയതിനെ ശക്തമായി വിമര്ശിച്ച് ഇന്ത്യ. ഇന്ത്യയില് ജോലി ചെയ്യുന്ന യുകെ, ഫ്രാന്സ്, ജര്മ്മനി എന്നീ മൂന്ന് രാജ്യങ്ങളിലെ നയതന്ത്രഉദ്യോഗസ്ഥരാണ് ടൈംസ് ഓഫ് ഇന്ത്യയില് ഇത്തരമൊരു ലേഖനം എഴുതിയത്.
ഉക്രൈനുമായുള്ള യുദ്ധത്തില് സമാധാനുണ്ടാക്കാന് റഷ്യയ്ക്ക് താല്പര്യമില്ല എന്ന രീതിയിലാണ് ഈ ലേഖനം. ഡിസംബര് 4,5 തീയതികളില് പുടിന് ഇന്ത്യ സന്ദര്ശിക്കാനിരിക്കെ എന്തിനാണ് ഇന്ത്യയില് ജോലി ചെയ്യുന്ന മൂന്ന് വിദേശരാജ്യങ്ങളിലെ നയതന്ത്രോദ്യോഗസ്ഥര് ഇങ്ങിനെ ഒരു ലേഖനം എഴുതിയത്. ഈ ലേഖനം പ്രസിദ്ധീകരിച്ചതിന്റെ സമയമാണ് വലിയ പ്രശ്നമുണ്ടാക്കിയത്. അതിനര്ത്ഥം വേണമെന്ന് വെച്ച് തന്നെയാണ് അവര് ഇത്തരമൊരു ലേഖനം എഴുതിയത് എന്നതാണ്.
ഫ്രഞ്ച് അംബാസഡറായ തിയറി മത്തു, ജര്മ്മനിയുടെ ഹൈകമ്മീഷണറായ ഫിലിപ്പ് അകര്മാന്, യുകെ ഹൈകമ്മീഷണറായ ലിന്ഡി കാമറൂണ് എന്നിവര് ചേര്ന്നാണ് ഈ ലേഖനം എഴുതിയിരിക്കുന്നത്. പുറത്തുള്ള ഒരു രാജ്യവുമായുള്ള ഇന്ത്യയുടെ ബന്ധത്തെ ഇന്ത്യയില് ജോലി ചെയ്യുന്ന വിദേശപ്രതിനിധികള് നിര്വ്വചിക്കാന് ശ്രമിക്കുന്നത് ഇന്ത്യയ്ക്ക് സ്വീകാര്യമല്ലെന്ന് ഇന്ത്യന് വിദേശകാര്യമന്ത്രാലയം വ്യക്തമാക്കിക്കഴിഞ്ഞു.
ഈ ലേഖനത്തില് ഉക്രൈനുമായുള്ള യുദ്ധത്തിന്റെ പേരില് പുടിനെ ഉടനീളം വിമര്ശിക്കുകയാണ്. പുടിന് ഇന്ത്യ സന്ദര്ശിക്കുന്ന വേളയില് പുടിനെ വിമര്ശിച്ച് ലേഖനം പ്രസിദ്ധീകരിക്കപ്പെടുന്നത് കേന്ദ്രസര്ക്കാരിനെ പരിഹസിക്കുന്നതിന് തുല്യമാണ്. ലോകം ഉക്രൈന് യുദ്ധം അവസാനിക്കണമെന്ന് ആഗ്രഹിക്കുന്നു, പക്ഷെ പുടിന് അതിനാഗ്രഹമില്ല എന്ന അര്ത്ഥം വരുന്ന രീതിയിലാണ് ലേഖനത്തിന് തലക്കെട്ട് തന്നെ.
വാര്ഷിക ഇന്ത്യ-റഷ്യ ഉച്ചകോടി സമ്മേളനത്തില് ഇന്ത്യന് പ്രധാനമന്ത്രിയുമായി ചര്ച്ച നടത്താന് ഇന്ത്യ നേരിട്ട് ക്ഷണിച്ചാണ് പുടിന് ഇന്ത്യയില് എത്തുന്നത്. ആ സമയത്ത് തന്നെ ഇത്തരമൊരു ലേഖനമെഴുതിയതിന്റെ സാംഗത്യമാണ് ഇന്ത്യ ചോദ്യം ചെയ്യുന്നത്.
