ന്യൂദല്ഹി: രാജ്യസഭാ ചെയര്മാനായി ചുമതലയേറ്റശേഷമുള്ള ആദ്യസമ്മേളനത്തില് സി.പി. രാധാകൃഷണന് ആശംസകളും അഭിനന്ദനങ്ങളും അറിയിച്ച് പ്രധാനമന്ത്രി നരേന്ദ്രമോദി. ചെയര്മാന്റെ നേതൃത്വം പാര്ലമെന്ററി പ്രവര്ത്തനങ്ങളെ കൂടുതല് ശക്തിപ്പെടുത്തുമെന്ന് പ്രധാനമന്ത്രി പറഞ്ഞു.
തന്റെ ജീവിതം മുഴുവന് സാമൂഹിക സേവനത്തിനായി സമര്പ്പിച്ച സി.പി. രാധാകൃഷണന് എല്ലാവര്ക്കും പ്രചോദനവും വഴികാട്ടിയുമാണെന്ന് പ്രധാനമന്ത്രി പറഞ്ഞു. ഒരു സാധാരണ കുടുംബത്തില് നിന്ന്, സാധാരണ സമൂഹത്തില് നിന്ന് വന്ന്, രാഷ്ട്രീയ മേഖലയില് സഞ്ചരിക്കുകയും ഈ ഉന്നത സ്ഥാനത്ത് എത്തുകയും നമ്മെയെല്ലാം നയിക്കുകയും ചെയ്യുന്നത് ഭാരത ജനാധിപത്യത്തിന്റെ ഏറ്റവും വലിയ ശക്തിയാണ്.
വിവിധ ചുമതലകള് വഹിച്ചപ്പോഴെല്ലാം പ്രോട്ടോക്കോളിനപ്പുറം നിലകൊണ്ടു. പൊതുജീവിതത്തില്, പ്രോട്ടോക്കോളിനപ്പുറം ജീവിക്കുന്നതില് ഒരു അതുല്യ ശക്തിയുണ്ടെന്ന് താന് വിശ്വസിക്കുന്നു, രാജ്യസഭാ ചെയര്മാനില് ആ ശക്തി എല്ലായ്പ്പോഴും കണ്ടിട്ടുണ്ട്. ഇത് അഭിമാനകരമായ കാര്യമാണ്.
ചെയര്മാന്റെ വ്യക്തിത്വത്തെ നിര്വചിക്കുന്ന സേവനം, സമര്പ്പണം, സംയമനം എന്നീ ഗുണങ്ങളെക്കുറിച്ച് എല്ലാവര്ക്കും അറിയാം.
സഭയുടെ അധ്യക്ഷന് എന്ന നിലയിലും ഉപരാഷ്ട്രപതി എന്ന നിലയിലും നിങ്ങളുടെ വിപുലമായ അനുഭവം പ്രചോദിപ്പിക്കുകയും നയിക്കുകയും ചെയ്യും. സഭയിലെ എല്ലാ അംഗങ്ങളും ഈ അഭിമാന നിമിഷം ആഴത്തിലുള്ള ഉത്തരവാദിത്തബോധത്തോടെ മുന്നോട്ട് കൊണ്ടുപോകുമെന്ന് ഉറപ്പുണ്ടെന്നും പ്രധാനമന്ത്രി പറഞ്ഞു. രാജ്യസഭയിലെ വിവിധ പാര്ട്ടി നേതാക്കളും സഭാ ചെയര്മാന് ആശംസകള് നേര്ന്നു.
