ഭോപ്പാൽ ; ഭാര്യ സുന്ദരിയല്ലെന്ന് പറഞ്ഞ് ക്രൂരമായി പീഡിപ്പിച്ച് മുത്തലാഖ് ചൊല്ലുമെന്ന് ഭീഷണിപ്പെടുത്തിയ ഭർത്താവിനെതിരെ കേസ് . മധ്യപ്രദേശിലെ ഛത്തർപൂരിലെ നൗഗാവോണിലുള്ള മദ്രസയിൽ പഠിപ്പിക്കുന്ന മൗലാന സദ്ദാം ഹുസൈനെതിരെ ഭാര്യ ഗൗസിയ ബാനോയാണ് ഗുരുതര കുറ്റങ്ങൾ ആരോപിച്ച് പരാതി നൽകിയത് . വിവാഹശേഷം ഭർത്താവ് തന്നെ തുടർച്ചയായി ഉപദ്രവിച്ചുവരികയാണെന്ന് ഗൗസിയ നൽകിയ പരാതിയിൽ പറയുന്നു.
താൻ സുന്ദരിയല്ലെന്ന് പറഞ്ഞ് ഭർത്താവ് അപമാനിക്കുകയും അതുകൊണ്ട് മുത്തലാഖ് ചൊല്ലുമെന്ന് ഭീഷണിപ്പെടുത്തുകയും ചെയ്തുവെന്നാണ് ആരോപണം. മാത്രമല്ല 12 ലക്ഷം രൂപ അധിക സ്ത്രീധനം ആവശ്യപ്പെട്ടതായും ഗൗസിയ ആരോപിക്കുന്നു.
ടികാംഗഡിലെ കുടില ഗ്രാമത്തിൽ താമസിക്കുന്ന ഗൗസിയ 2023 ഒക്ടോബർ 25 നാണ് മൗലാനയെ വിവാഹം കഴിച്ചത് . വിവാഹം കഴിഞ്ഞയുടനെ ഭർത്താവ് സ്ത്രീധനം ആവശ്യപ്പെട്ട് ഉപദ്രവിക്കാൻ തുടങ്ങിയെന്നും യുവതി പറഞ്ഞു.
മൂന്ന് തവണ ഭർത്താവിന്റെ അടുത്തേക്ക് പോയെങ്കിലും ഓരോ തവണയും പീഡനം നേരിട്ടതായി യുവതി പറഞ്ഞു. ഭർത്താവിന് അവിഹിത ബന്ധമുണ്ടെന്നും പെട്രോൾ ഒഴിച്ച് കത്തിക്കുമെന്ന് ഭീഷണിപ്പെടുത്തിയെന്നും അവർ ആരോപിച്ചു. 2025 ഒക്ടോബർ 13 ന് നൗഗാവ് പോലീസ് സ്റ്റേഷനിൽ ആദ്യം പരാതി നൽകിയെങ്കിലും നടപടിയൊന്നും സ്വീകരിച്ചില്ല. തുടർന്ന് പോലീസ് സൂപ്രണ്ടിനെ സമീപിച്ച് പരാതി നൽകുകയായിരുന്നു.
