ന്യൂദൽഹി: സിഐഎ-മൊസാദ് ചാരസംഘടനകളുടെ ഗൂഢാലോചന മൂലമാണ് പാർട്ടി തോറ്റതെന്ന കോൺഗ്രസ് നേതാവിന്റെ വാദത്തെ ശക്തമായി എതിർത്ത് ബിജെപി. പാർട്ടി ദേശീയ വക്താവും എംപിയുമായ സംബിത് പത്രയാണ് കോൺഗ്രസ് നേതാവായ കുമാർ കേത്കറുടെ ആരോപണങ്ങൾക്ക് തക്ക മറുപടി നൽകിയത്.
ഐഎസ്ഐയുടെ ബ്ലൂപ്രിന്റിൽ പ്രവർത്തിക്കുന്ന, ബാബരി പുനർനിർമ്മാണത്തെക്കുറിച്ച് സംസാരിക്കുന്ന, രാമക്ഷേത്രത്തെ എതിർക്കുന്ന ഒരു പാർട്ടിക്ക് എങ്ങനെ പുരോഗമിക്കാൻ കഴിയുമെന്ന് മുൻ കോൺഗ്രസ് രാജ്യസഭാ എംപി കുമാർ കേത്കറുടെ ആരോപണങ്ങളോട് പ്രതികരിച്ചുകൊണ്ട് സംബിത് പത്ര ചോദിച്ചു.
ജനങ്ങളാണ് ബിജെപിയെ വിജയിപ്പിക്കുന്നത്
പാകിസ്ഥാൻ രഹസ്യാന്വേഷണ ഏജൻസിയായ ഐഎസ്ഐയുടെ അജണ്ട ഇന്ത്യയിൽ മുന്നോട്ടുകൊണ്ടുപോയതിനാലാണ് കോൺഗ്രസ് പരാജയപ്പെട്ടതെന്ന് കോൺഗ്രസ് നേതാവിന് മറുപടിയായി സംബിത് പത്ര പറഞ്ഞു. ബിജെപിയുടെ വിജയങ്ങൾക്ക് കാരണം വിദേശ രഹസ്യാന്വേഷണ ഏജൻസികളല്ല, ജനങ്ങളുടെ പിന്തുണയാണെന്ന് കേത്കറിന്റെ ആരോപണങ്ങൾക്ക് മറുപടിയായി പത്ര പറഞ്ഞു.
കൂടാതെ ബിജെപിയെ വിജയിപ്പിക്കുന്നത് സിഐഎയോ മൊസാദോ അല്ല മറിച്ച് ജനങ്ങളാണ്. ദരിദ്രരും കർഷകരും സ്ത്രീകളും യുവാക്കളുമാണ് ബിജെപിയെ വിജയിപ്പിക്കുന്നതെന്നും അദ്ദേഹം പറഞ്ഞു. കോൺഗ്രസിന്റെ ആരോപണങ്ങൾക്കെതിരെ ബിജെപി എംപി രൂക്ഷമായിട്ടാണ് പ്രതികരിച്ചത്.
നേരത്തെ ഭരണഘടനാ ദിനത്തോടനുബന്ധിച്ച് കോൺഗ്രസ് പാർട്ടി സംഘടിപ്പിച്ച ഒരു പരിപാടിയിൽ മുൻ രാജ്യസഭാ എംപി കുമാർ കേത്കർ, 2014-ൽ കോൺഗ്രസ് തോറ്റത് യുഎസ് രഹസ്യാന്വേഷണ ഏജൻസിയായ സിഐഎയും ഇസ്രായേൽ രഹസ്യാന്വേഷണ ഏജൻസിയായ മൊസാദും ഗൂഢാലോചന നടത്തിയതുകൊണ്ടാണെന്ന് ആരോപിച്ചാണ് വലിയ കോളിളക്കം സൃഷ്ടിച്ചത്.
