ന്യൂദല്‍ഹി: ഓണ്‍ലൈനുകളിലെ രാജ്യവിരുദ്ധ അശ്ലീല ഉള്ളടക്കങ്ങള്‍ വിലക്കാന്‍ കര്‍ശന നിയമം വേണമെന്ന് സുപ്രീംകോടതി. ഓണ്‍ലൈന്‍ സൈറ്റുകള്‍ ഉപയോഗിക്കുന്നവരുടെ പ്രായം പരിശോധിക്കാന്‍ ആധാര്‍ അധിഷ്ഠിത സംവിധാനം ഒരുക്കണമെന്നും ചീഫ് ജസ്റ്റിസ് ജസ്റ്റിസ് സൂര്യകാന്ത്, ജസ്റ്റിസ് ജോയ് മല്ല്യ ബാഗ്ചി എന്നിവരടങ്ങിയ ബെഞ്ച് കേന്ദ്രസര്‍ക്കാരിനോട് നിര്‍ദേശിച്ചു. അശ്ലീലം പുസ്തകത്തിലോ ചിത്രത്തിലോ ആവട്ടെ. പക്ഷെ പരസ്യമായിട്ടാണെങ്കില്‍ അതിന് നിയന്ത്രണവും വേണം. ഫോണ്‍ തുറന്നാല്‍ ഉടന്‍ നിങ്ങള്‍ക്ക് വേണ്ടത്തതോ കാണാന്‍ ആഗ്രഹമില്ലാത്തതോ ആകും പ്രത്യക്ഷപ്പെടുക. പിന്നെന്തു ചെയ്യും, കോടതി ചോദിച്ചു.
ചിലപ്പോള്‍ ഉള്ളടക്കത്തെപ്പറ്റി മുന്നറിയിപ്പ് ലഭിക്കുമെങ്കിലും അതു പോര, ഓണ്‍ലൈനില്‍ സൈറ്റുകള്‍ പരതുന്നവരുടെ പ്രായം പരിശോധിക്കാന്‍ കൂടി സംവിധാനം വേണം. ചീഫ് ജസ്റ്റിസ് പറഞ്ഞു. ഇത്തരമൊരു സംവിധാനം ഏര്‍പ്പെടുത്തി പരിശോധിച്ചു നോക്കുക. അഭിപ്രായ സ്വാതന്ത്ര്യത്തിനു തടസം വരികയാണെങ്കില്‍ അപ്പോള്‍ നോക്കാം. ഉത്തരവാദിത്തമുള്ള ഒരു സമൂഹം നമുക്ക് കെട്ടിപ്പടുക്കേണ്ടതുണ്ട്. അതുണ്ടായാല്‍ എല്ലാ പ്രശ്‌നങ്ങളും പരിഹരിക്കപ്പെടും, അദ്ദേഹം പറഞ്ഞു. മോശം ഉള്ളടക്കമുള്ള പരിപാടികള്‍ അവതരിപ്പിച്ച പോഡ്കാസ്‌റ്റേഴ്‌സും കൊമേഡിയന്മാരുമായി ബന്ധപ്പെട്ട ഹര്‍ജികള്‍ പരിഗണിക്കുകയായിരുന്നു കോടതി.
ഓണ്‍ലൈന്‍ ഉള്ളടക്കം നിയന്ത്രിക്കാന്‍ ഒരു സ്വയം ഭരണസ്ഥാപനം വേണം. എന്ത് അനുവദിക്കാം എന്ത് അനുവദിക്കരുത് എന്ന് അവര്‍ തീരുമാനിക്കട്ടെ. ഇതേ സമയം പൗരന്മാരുടെ മൗലിക അവകാശങ്ങള്‍ പാലിക്കപ്പെടണം, ആരുടെയും വായ മൂടിക്കെട്ടാന്‍ അനുവദിക്കുകയും ചെയ്യരുത്. അതു പോലെ വൈകല്യങ്ങള്‍ ഉള്ളവരെ അവഹേളിക്കാനും അനുവദിക്കാനാവില്ല. ഇക്കാര്യത്തിലും എസ്‌സി, എസ്ടി നിയമം പോലെ കര്‍ശന നിയമം വേണം. ഹാസ്യം ആരുടെയെങ്കിലും ചെലവില്‍ വേണ്ട, രണ്‍വീര്‍ അലഹ്ബാദിയയുടെ ഹര്‍ജി പരിഗണിക്കവേ കോടതി പറഞ്ഞു.
ഓണ്‍ലൈനുകളില്‍ രാജ്യവിരുദ്ധ ഉള്ളടക്കങ്ങളും ധാരാളമാണ്. ഇത് ആശങ്കാകരമാണ്. ഈ പ്രശ്‌നം പരിഹരിക്കാന്‍ സ്വയം നിയന്ത്രണം മതിയാകുമെന്ന് തോന്നുന്നില്ല. ജസ്റ്റിസ് ബാഗ്ചി പറഞ്ഞു. രാജ്യവിരുദ്ധവും സാമൂഹ്യ ഘടന തകര്‍ക്കുന്നതുമായ ഉള്ളടക്കങ്ങള്‍ക്ക് സ്വയം നിയന്ത്രണം മതിയാകുമെന്ന് തോന്നുന്നില്ല. സമയക്കുറവാണ് പ്രശ്‌നം. എതെങ്കിലും ഒന്നില്‍ സര്‍ക്കാര്‍ പ്രതികരിക്കുമ്പോഴേക്കും ആ പരിപാടി ലക്ഷക്കണക്കിന് പേര്‍ കണ്ട് വൈറലായിക്കഴിഞ്ഞിരിക്കും, അദ്ദേഹം പറഞ്ഞു.
രാജ്യവിരുദ്ധമെന്ന് വാക്ക് അവ്യക്തമാണെന്നായി ഹര്‍ജിക്കാര്‍ക്കു വേണ്ടി ഹാജരായ പ്രശാന്ത് ഭൂഷണ്‍. ഓണ്‍ ലൈന്‍ ഉള്ളടക്കവുമായി ബന്ധപ്പെട്ട് ഒരു ഉന്നത തല യോഗം ചേരാന്‍ സര്‍ക്കാര്‍ തീരുമാനിച്ചിട്ടുണ്ടെന്ന് അറ്റോര്‍ണി ജനറല്‍ ആര്‍. വെങ്കടരമണി പറഞ്ഞു.
