കൊച്ചി: ഫാക്ടറി പരിസരത്ത് മാത്രം ഉപയോഗിക്കുമ്പോള് പോലും ഫോര്ക്ക്ലിഫ്റ്റുകളും ക്രെയിനുകളും ‘മോട്ടോര് വാഹനങ്ങള്’ എന്നതിന്റെ നിര്വചനത്തില് വരുമെന്നും അതിനാല് മോട്ടോര് വാഹന നിയമപ്രകാരം രജിസ്റ്റര് ചെയ്യേണ്ടതുണ്ടെന്നും വാഹന നികുതിക്ക് വിധേയമാകുമെന്നും ഹൈക്കോടതി വിധിച്ചു.
എറണാകുളം മുളന്തുരുത്തിയിലെ പ്ലൈവുഡ്, വെനീര് നിര്മാണ കമ്പനി സമര്പ്പിച്ച ഹര്ജി തള്ളിയാണ് ജസ്റ്റിസ് സി. പി. മുഹമ്മദ് നിയാസ് വിധി പുറപ്പെടുവിച്ചത്. ഉപകരണങ്ങള് ഉപയോഗിക്കുന്നത് നിര്ത്താന് നിര്ദ്ദേശിച്ച് തൃപ്പൂണിത്തുറ സബ് ആര്ടിഒ നല്കിയ നോട്ടീസാണ് ഹര്ജിക്കാര് പ്രധാനമായും ചോദ്യം ചെയ്തത്. ആറ് ഏക്കര് വിസ്തൃതിയുള്ള ഫാക്ടറി പരിസരത്ത് തടികള് ഉയര്ത്തുന്നതിനും നീക്കുന്നതിനും മാത്രമായി ഉപയോഗിക്കുന്ന രണ്ട് ഫോര്ക്ക്ലിഫ്റ്റുകളും ഒരു ക്രെയിനും കമ്പനിക്ക് സ്വന്തമായുണ്ട്. അടച്ചിട്ട ഫാക്ടറി കോമ്പൗണ്ടിനുള്ളില് മെറ്റീരിയല് കൈകാര്യം ചെയ്യുന്നതിനുള്ള ഉപകരണങ്ങളായി മാത്രമേ ഈ യന്ത്രങ്ങള് പ്രവര്ത്തിക്കുന്നുള്ളൂവെന്നും പൊതു റോഡുകളില് ഒരിക്കലും ഉപയോഗിക്കാറില്ലെന്നും ഹര്ജിക്കാര് വാദിച്ചു.
എന്നാല്, ഫോര്ക്ക്ലിഫ്റ്റുകളും ക്രെയിനും 1976 ലെ കേരള മോട്ടോര് വെഹിക്കിള്സ് ടാക്സേഷന് ആക്ട് പ്രകാരം രജിസ്ട്രേഷനും നികുതിയും ആവശ്യമുള്ള മോട്ടോര് വാഹനങ്ങളാണെന്നും അവ രജിസ്റ്റര് ചെയ്യാന് ഹര്ജിക്കാരന് വിസമ്മതിക്കുന്നത് മോട്ടോര് വെഹിക്കിള്സ് ആക്ടിന്റെ ലംഘനമാണെന്നും സംസ്ഥാന മോട്ടോര് വാഹന വകുപ്പ് വാദിച്ചു. ഈ വാദം അംഗീകരിച്ച കോടതി നിര്ബന്ധിത രജിസ്ട്രേഷന്, ഇന്ഷുറന്സ്, വാഹന നികുതി അടയ്ക്കല് എന്നിവ ആവശ്യമാണെന്നും വിധിച്ചു.
