തിരുവനന്തപുരം:തദ്ദേശതെരഞ്ഞെടുപ്പില്‍ നാമനിര്‍ദ്ദേശ പത്രിക പിന്‍വലിക്കാനുള്ള സമയപരിധി കഴിഞ്ഞപ്പോള്‍ വിമത ശല്യം ഇടതു-വലതു മുന്നണികളെ വലയ്‌ക്കുന്നു. തിരുവനന്തപുരം കോര്‍പ്പറേഷനില്‍ എല്‍ഡിഎഫിനും യുഡിഎഫിനും അഞ്ചിടങ്ങളിലാണ് വിമതരുടെ ഭീഷണി. കൊച്ചി കോര്‍പ്പറേഷനില്‍ പത്ത് വാര്‍ഡിലാണ് യുഡിഎഫിന് വിമത ഭീഷണിയുളളത്.
തൃശൂരില്‍ കോണ്‍ഗ്രസിനും സിപിഎമ്മിനും സിപിഐക്കും വിമത ഭീഷണിയുണ്ട്. വയനാട്ടിലെ തോമാട്ടുചാല്‍ ഡിവിഷനില്‍ വിമതനായി നിന്ന യൂത്ത് കോണ്‍ഗ്രസ് നേതാവ് ജഷീര്‍ പള്ളിവയല്‍ അനുനയത്തിന് വഴങ്ങി പിന്‍വാങ്ങി. തിരുവനന്തപുരം കോര്‍പ്പറേഷനില്‍ ഉള്ളൂര്‍, വാഴോട്ടുകോണം, ചെമ്പഴന്തി, കാച്ചാണി, വിഴിഞ്ഞം വാര്‍ഡുകളിലാണ് ഇടത് വിമതരുളളത്. വാഴോട്ടുകോണത്തെ സിപിഎം വിമതന്‍ കെവി മോഹനനെ പാര്‍ട്ടി പുറത്താക്കി. കണ്ണൂര്‍ ചെറുകുന്ന് പഞ്ചായത്തിലെ വിമത സ്ഥാനാര്‍ത്ഥി കുന്നനങ്ങാട് സെന്റര്‍ ബ്രാഞ്ച് സെക്രട്ടറി ഇ ബാബുരാജിനെയും സിപിഎം പുറത്താക്കി. മറ്റുള്ളവരെ നേരത്തെ പുറത്താക്കിയിട്ടുണ്ട്.
യുഡിഎഫിന് തിരുവനന്തപുരത്ത് പൗണ്ട് കടവിലും ഉള്ളൂരിലും കഴക്കൂട്ടത്തും പുഞ്ചക്കരിയിലും വിഴിഞ്ഞത്തുമാണ് വിമതശല്യം. വിഴിഞ്ഞത്ത് രണ്ട് വിമതരുണ്ടായിരുന്നതില്‍ ഒരാള്‍ പിന്മാറിയെങ്കിലും യൂത്ത് കോണ്‍ഗ്രസ് നേതാവ് ഹിസാന്‍ മത്സര രംഗത്ത് തുടരുകയാണ്.
കൊച്ചിയില്‍ മുന്‍ ഡെപ്യൂട്ടി മേയര്‍ പ്രേംകുമാര്‍ ഉള്‍പ്പെടെ പത്ത് പേരാണ് യുഡിഎഫിന് വിമതരായി മത്സരരംഗത്തുളളത്. മലപ്പുറം പള്ളിക്കല്‍ പഞ്ചായത്തിലെ കൂട്ടാലങ്ങുല്‍ വാര്‍ഡില്‍ യുഡിഎഫിനായി ഒമ്പതുപേരാണ് പത്രിക നല്‍കിയത്. അനുനയത്തിനൊടുവില്‍ കോണ്‍ഗ്രസിന് അത് രണ്ടാക്കാനായി.
ഡിസിസി ജനറല്‍ സെക്രട്ടറി സ്ഥാനം രാജിവെച്ചാണ് ആലപ്പുഴ നഗരസഭയില്‍ കളപ്പുരവാര്‍ഡിലെ രാജു താന്നിക്കല്‍ വിമതനായി മത്സരിക്കുന്നത്.അമ്പലപ്പുഴ ജില്ലാ പഞ്ചായത്ത് ഡിവിഷനില്‍ കോണ്‍ഗ്രസ് സ്ഥാനാര്‍ത്ഥി എആര്‍ കണ്ണന്‍ സ്ഥാനാര്‍ത്ഥിയാകും.നാമനിര്‍ദ്ദേശ പത്രിക കൊടുത്ത ലീഗ് സ്ഥാനാര്‍ത്ഥി അല്‍ത്താഫ് സുബൈര്‍ പിന്‍വലിച്ചു. വിമതര്‍ പിന്‍വാങ്ങിയില്ലെങ്കില്‍ പുറത്താക്കുമെന്ന് കോണ്‍ഗ്രസ് നേതാക്കള്‍ പറഞ്ഞു.
