പത്തനംതിട്ട: ശബരിമല സ്വര്ണക്കൊള്ള കേസില് റിമാന്ഡിലുള്ള മുന് ദേവസ്വം ബോര്ഡ് പ്രസിഡന്റ് എ. പത്മകുമാറിനെ കൂടുതല് ചോദ്യം ചെയ്യാന് നാളെ കസ്റ്റഡിയില് വാങ്ങും. കഴിഞ്ഞ ദിവസം പത്മകുമാറിന്റെ വീട് റെയ്ഡ് ചെയ്തപ്പോള് ലഭിച്ച രേഖകളുടെ അടിസ്ഥാനത്തിലാകും ചോദ്യം ചെയ്യല്. ഉണ്ണികൃഷ്ണന് പോറ്റിയുമായി ഇയാള്ക്കുള്ള ബന്ധം വ്യക്തമാക്കുന്ന തെളിവുകള് റെയ്ഡില് എസ്ഐടിക്കു ലഭിച്ചിട്ടുണ്ട്. പോറ്റി പല തവണ പത്മകുമാറിന്റെ ആറന്മുളയിലെ വസതിയിലെത്തിയിട്ടുണ്ടെന്ന് ബന്ധുക്കള്ത്തന്നെ പറഞ്ഞതായാണ് അറിവ്. പരിചയത്തിന്റെ പേരില് സാധാരണ സന്ദര്ശനം മാത്രമായിരുന്നെന്നാണ് ബന്ധുക്കളുടെ വിശദീകരണം.
നാളെ പത്മകുമാറിനെ ചോദ്യം ചെയ്യാനിരിക്കേ ദേവസ്വം ബോര്ഡുമായും സര്ക്കാരുമായും ബന്ധമുള്ള പലരുടെയും നെഞ്ചിടിപ്പ് ഏറുകയാണ്. കൊള്ളയ്ക്കു പിന്നില് പത്മകുമാര് ഒറ്റയ്ക്കല്ലെന്നും പല ഉന്നതര്ക്കും ഇതില് പങ്കുണ്ടെന്നും വ്യക്തമാക്കുന്ന രേഖകള് എസ്ഐടിക്കു റെയ്ഡില് ലഭിച്ചിട്ടുണ്ട്. ഇതിന്റെ അടിസ്ഥാനത്തിലാവും പ്രതിപ്പട്ടികയില് ശേഷിക്കുന്നവരുടെ ചോദ്യം ചെയ്യലും അറസ്റ്റും. സ്വര്ണപ്പാളികള് ചെമ്പായി മാറിയതിനെപ്പറ്റി തങ്ങള്ക്കൊന്നും അറിയില്ലെന്നാണ് ശങ്കരദാസ് അടക്കമുള്ള ബോര്ഡ് അംഗങ്ങള് അറിയിച്ചത്. എന്നാല് പത്മകുമാറിന്റെ മൊഴി മുന് ദേവസ്വം അംഗങ്ങള്ക്കുമെതിരാണ്. ഇതില് ശങ്കരദാസിന്റെ പങ്ക് പത്മകുമാര് എടുത്തുപറഞ്ഞിട്ടുണ്ട്.
