ന്യൂദല്ഹി: നാല് തൊഴില് നിയമ സംഹിതകള് (ലേബര് കോഡുകള്) രാജ്യത്ത് ഇന്നലെ മുതല് പ്രാബല്യത്തില് വന്നെന്ന് പ്രധാനമന്ത്രി നരേന്ദ്രമോദി പ്രഖ്യാപിച്ചു. വേതനം
സംബന്ധിച്ച കോഡ് 2019, വ്യാവസായിക ബന്ധം കോഡ് 2020, സാമൂഹിക സുരക്ഷ കോഡ് 2020, തൊഴില്പരമായ ആരോഗ്യം, സുരക്ഷ, ജോലി സാഹചര്യങ്ങള് കോഡ് 2020 എന്നിവയാണ് പ്രാബല്യത്തില് വന്നത്. തൊഴില് നിയമങ്ങള് ലളിതമാക്കുകയും കാര്യക്ഷമമാക്കുകയും ലക്ഷ്യമിട്ടാണിത്. നിലവിലുള്ള 29 തൊഴില് നിയമങ്ങള് യുക്തിസഹമായി നടപ്പാക്കുന്നതിലൂടെയാണ് ഇത് സാധ്യമാകുന്നത്. സ്വാതന്ത്ര്യത്തിനുമുമ്പും സ്വാതന്ത്ര്യാനന്തര കാലഘട്ടത്തിന്റെ തുടക്കത്തിലുമാണ് രാജ്യത്തെ പലതൊഴില് നിയമങ്ങളും രൂപപ്പെടുത്തിയത്.
സ്വാതന്ത്ര്യത്തിന് ശേഷമുള്ള ഏറ്റവും ശക്തവും സമഗ്രവും പുരോഗമനപരവുമായ തൊഴില് കേന്ദ്രീകൃത പരിഷ്കാരങ്ങളില് ഒന്നാണിതെന്ന് പ്രധാനമന്ത്രി അഭിപ്രായപ്പെട്ടു. ഇത് തൊഴിലാളികളെ കൂടുതല് ശാക്തീകരിക്കും. ഈ കോഡുകള് നമ്മുടെ ജനങ്ങള്ക്ക്, പ്രത്യേകിച്ച് നാരീശക്തി, യുവശക്തി എന്നിവര്ക്ക്, സാര്വത്രിക സാമൂഹിക സുരക്ഷ, മിനിമവും സമയബന്ധിതവുമായ വേതനം, സുരക്ഷിതമായ ജോലിസ്ഥലങ്ങള്, പ്രതിഫലദായകമായ അവസരങ്ങള് എന്നിവയ്ക്കുള്ള ശക്തമായ അടിത്തറയായി വര്ത്തിക്കും. തൊഴിലാളികളുടെ അവകാശങ്ങള് സംരക്ഷിക്കുകയും ഭാരതത്തിന്റെ സാമ്പത്തികവളര്ച്ച ശക്തിപ്പെടുത്തുകയും ചെയ്യുന്ന ഭാവിക്ക് അനുയോജ്യമായ ഒരു ആവാസവ്യവസ്ഥ സൃഷ്ടിക്കും. ഈ പരിഷ്കാരങ്ങള് തൊഴിലവസരങ്ങള് സൃഷ്ടിക്കുകയും ഉത്പ്പാദനക്ഷമത വര്ദ്ധിപ്പിക്കുകയും ഒരു വികസിത ഭാരതത്തിലേക്കുള്ള നമ്മുടെ യാത്രയെ ത്വരിതപ്പെടുത്തുകയും ചെയ്യുമെന്നും പ്രധാനമന്ത്രി അഭിപ്രായപ്പെട്ടു.
