പത്തനംതിട്ട: ശബരിമല സ്വര്ണക്കൊള്ളക്കേസില് ഇന്നലെ അറസ്റ്റിലായ എ. പത്മകുമാറിനെ ദേവസ്വം ബോര്ഡ് പ്രസിഡന്റായി 2017 നവംബറില് അവരോധിച്ചത് മുഖ്യമന്ത്രി പിണറായി വിജയന്റെ പ്രത്യേക താത്പര്യ പ്രകാരം. വി.എസ്. പക്ഷത്തിന് മുന്തൂക്കം ഉണ്ടായിരുന്ന പത്തനംതിട്ട ജില്ലയെ പിണറായി പക്ഷത്തേക്ക് എത്തിക്കാന് ശ്രമിച്ചതില് പത്മകുമാര് മുന്നിലുണ്ടായിരുന്നു. എന്നാല് 2010-കാലത്ത് സിപിഎമ്മിനു വേണ്ടി ആറന്മുള വിമാനത്താവള സമരത്തിന്റെ മുന്നണി പോരാളികളില് ഒരാളായ ശേഷമാണ് പിണറായിയുടെ പ്രീതി നേടാന് പത്മകുമാര് വീണ്ടും ശ്രമം ആരംഭിച്ചത്.
2016-ല് അധികാരമേറ്റ പിണറായി ആറന്മുള, മല്ലപ്പുഴശേരി, കിടങ്ങന്നൂര് വില്ലേജുകളെ വ്യവസായ മേഖലാ പരിധിയില് ഉള്പ്പെടുത്തിയ നടപടി റദ്ദാക്കി ആറന്മുള പുഞ്ചയില് നെല്വിത്തു വിതയ്ക്കാന് എത്തിയിരുന്നു. എന്ജിനിയറിങ് കോളജ് അങ്കണത്തില് തയ്യാറാക്കിയ പ്രത്യക വേദിയില് പിണറായിയെ നേരില് കാണാന് കുടുംബ സമേതമാണ് പത്മകുമാര് അന്ന് എത്തിയത്. പിന്നീട് മുഖ്യമന്ത്രിയെ ക്ലിഫ് ഹൗസില് എത്തി കുടുംബ സമേതം നേരില് കണ്ടു. ഇതോടെയാണ് പത്മകുമാര് മുഖ്യമന്ത്രിയുടെ പ്രീതിക്കു പാത്രമായതും 2017-ല് ദേവസ്വം പ്രസിഡന്റ് പദവിയിലേക്ക് എത്തിയതും.
എന്നാല് യുവതി പ്രവേശന വിഷയത്തില് ‘തന്റെ കുടുംബത്തില് നിന്നും സ്ത്രീകളാരും മല ചവിട്ടുകയില്ലെന്ന്’ പത്മകുമാര് പറഞ്ഞതോടെ അദ്ദേഹം പിണറായി വിരുദ്ധനും പാര്ട്ടിക്ക് അനഭിമതനുമായി.
