കൊച്ചി: ഗുണമേന്മയിലും സുരക്ഷയിലും ദേശീയ നിലവാരം പാലിച്ചതിന് അമൃത ആശുപത്രിയിലെ അത്യാഹിത വിഭാഗത്തിന് നാഷണല് അക്രഡിറ്റേഷന് ബോര്ഡ് ഫോര് ഹോസ്പിറ്റല്സ് ആന്ഡ് ഹെല്ത്ത് കെയര് പ്രൊവൈഡേഴ്സിന്റെ (എന്എബിഎച്ച്) അംഗീകാരം. ക്ലിനിക്കല് പ്രോട്ടോക്കോളുകള്, അത്യാഹിത സാഹചര്യങ്ങളെ നേരിടാനുള്ള സജ്ജീകരണം, അടിസ്ഥാന സൗകര്യങ്ങള്, രോഗി പരിചരണ പ്രക്രിയകള് എന്നിവയുടെ വിശദമായ വിലയിരുത്തലിനെ തുടര്ന്നാണ് ഈ സര്ട്ടിഫിക്കേഷന് ലഭിച്ചത്.
അത്യാഹിത സേവനങ്ങള്ക്കായി ഈ പ്രത്യേക അംഗീകാരം നേടുന്ന രാജ്യത്തെ ചുരുക്കം ചില അത്യാഹിത പരിചരണ കേന്ദ്രങ്ങളില് ഒന്നായി ഇതോടെ അമൃത ആശുപത്രി മാറി. അത്യാഹിത വിഭാഗത്തില് നിലവില് 30 പ്രത്യേക കിടക്കകളും, വന്തോതിലുള്ള അപകടങ്ങള് കൈകാര്യം ചെയ്യുന്നതിനായി 40 അധിക കിടക്കകളും സജ്ജീകരിച്ചിട്ടുണ്ട്. ഇതിനായി ലാബ്, റേഡിയോളജി സേവനങ്ങള്, അത്യാഹിത ഓപ്പറേഷന് തിയേറ്റര്, പോയിന്റ്-ഓഫ്-കെയര് ടെസ്റ്റിങ് സൗകര്യങ്ങള് എന്നിവയുടെ പിന്തുണയുമുണ്ട്. 2012ല് ആരംഭിച്ച, കേരളത്തിലെ ആദ്യത്തെ അംഗീകൃത എമര്ജന്സി മെഡിസിന് എംഡി കോഴ്സും, കൂടാതെ ബിഎസ്സി, എംഎസ്സി എമര്ജന്സി മെഡിക്കല് ടെക്നീഷ്യന് കോഴ്സുകള് ഉള്പ്പെടെയുള്ള അലൈഡ് ഹെല്ത്ത് സയന്സസ് കോഴ്സുകളും അത്യാഹിത വിഭാഗത്തിന് കീഴില് നടത്തിവരുന്നു. ബിഎല്എസ്, എസിഎല്എസ്, പിഎഎല്എസ്. സര്ട്ടിഫിക്കേഷന് കോഴ്സുകള് നല്കുന്ന അമേരിക്കന് ഹാര്ട്ട് അസോസിയേഷന്റെ (എഎച്ച്എ) ഇന്റര്നാഷണല് ട്രെയിനിങ് സെന്റര് കൂടിയാണ് അമൃത ആശുപത്രി.
