ന്യൂദല്ഹി: സെന്ട്രല് ദല്ഹി മെട്രോ സ്റ്റേഷനിലെ പ്ലാറ്റ്ഫോമില് നിന്ന് ചാടി ജീവനൊടുക്കിയ സെന്റ് കൊളംബാസ് സ്കൂളിലെ പത്താം ക്ലാസ് വിദ്യാര്ത്ഥി ശൗര്യ പാട്ടീലിന്റെ ആത്മഹത്യാകുറിപ്പിലെ ഹൃദയഭേദകമായ വിവരങ്ങള് പുറത്തുവരുന്നു. രക്ഷിതാക്കളെയും സഹോദരനെയും അഭിസംബോധന ചെയ്തുള്ള ശൗര്യയുടെ വാക്കുകള് ആരുടേയും ഉള്ളുലയ്ക്കും.
ആത്മഹത്യാക്കുറിപ്പില് ശൗര്യ തന്റെ കുടുംബത്തിലെ ഒരോരുത്തരോടും പത്യേകം ക്ഷമാപണം നടത്തുന്നുണ്ട്: ‘ക്ഷമിക്കണം മമ്മി, ഞാന് മമ്മിയുടെ ഹൃദയത്തെ പലതവണ നൊമ്പരപ്പെടുത്തി. അവസാനമായി ഒരിക്കല്കൂടി ഞാന് അത് ചെയ്യുന്നു. സ്കൂളിലെ അധ്യാപകര് ഇങ്ങനെയാണ്, ഞാന് എന്തു പറയാനാണ്്?.
തന്റെ മൂത്ത സഹോദരനോട് അവന് പറഞ്ഞു: ‘ക്ഷമിക്കണം ഭയ്യ, ഞാന് നിന്നോട് മോശമായി പെരുമാറി, നിന്നോട് തര്ക്കിച്ചു, നിന്നെ ബഹുമാനിച്ചില്ല.
‘ക്ഷമിക്കണം അച്ഛാ, ഞാനും നിങ്ങളെപ്പോലെ ഒരു നല്ല മനുഷ്യനാകേണ്ടതായിരുന്നു’ എന്നായിരുന്നു അച്ഛനുള്ള കുറിപ്പ്.
ഈ 16 വയസ്സുകാരന്റെ സ്കൂള് ബാഗില് നിന്ന് ലഭിച്ച ഈ കൈയ്യെഴുത്തില് ഒരുവര്ഷമായി സ്കൂളില്നിന്ന് നേരിട്ട പീഡനങ്ങളെക്കുറിച്ചും പറയുന്നുണ്ട്. അധ്യാപകര് നിരന്തരം പരിഹസിക്കുകയും മോശമായി പെരുമാറുകയും ചെയ്തുവെന്ന് കുറിപ്പില് പറയുന്നു.
കഴിഞ്ഞദിവസം നൃത്തപരിശീലനത്തിനിടെ വീണതിനെ തുടര്ന്ന് പരസ്യമായി അപമാനിക്കപ്പെട്ടപ്പോള് വേദിയില് വെച്ച് ശൗര്യ പൊട്ടിക്കരഞ്ഞുപോയി. ‘എത്ര വേണമെങ്കിലും കരയാം, ഞങ്ങള്ക്ക് അത് പ്രശ്നമേയല്ല’ എന്നാണ് ഒരു അധ്യാപകന് അവനോട് അപ്പോള് പറഞ്ഞതെന്ന് പിതാവ് പ്രദീപ് പാട്ടീല് ഒരു ടെലിവിഷന് ചാനലിനോട് വെളിപ്പെടുത്തി.
‘ക്ഷമിക്കണം, ഞാന് മമ്മിയുടെ ഹൃദയത്തെ ഒരിക്കല്ക്കൂടി നൊമ്പരപ്പെടുത്തുകയാണ്…’ ശൗര്യയുടെ ആത്മഹത്യാകുറിപ്പില് ഉള്ളുലയ്ക്കുന്ന വാക്കുകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.