കരുനാഗപ്പള്ളി: അക്കാദമിക, ഗവേഷണ രംഗത്തെ പുത്തനുണര്വിന് അമൃതയുമായി സഹകരിക്കാനൊരുങ്ങി ഫ്രാന്സിലെ മികച്ച സാങ്കേതിക സര്വകലാശാലയായ ഐഎംടി അറ്റ്ലാന്റിക്. ഐഎംടി അറ്റ്ലാന്റിക്കിന്റെ ഫ്രാന്സിലെ നാന്റസിലുള്ള കാമ്പസില് അമൃത സര്വകലാശാലാ പ്രൊ വൈസ് ചാന്സലര് ഡോ. മനീഷ വി. രമേഷ് ഐഎംടി അറ്റ്ലാന്റിക് പ്രസിഡന്റ് പ്രൊഫ. ക്രിസ്റ്റോഫ് ലെറൂജ് എന്നിവര് ധാരണാപത്രത്തില് ഒപ്പുവച്ചു.
ഫ്രാന്സിലെ ഉന്നത എന്ജിനീയറിങ് സ്ഥാപനങ്ങളായ ഗ്രാന്ഡെസ് എക്കോള്സില് ഒന്നാണ് ഐഎംടി അറ്റ്ലാന്റിക്. ഗവേഷണം, നവീകരണം, അക്കാദമിക പങ്കാളിത്തം എന്നിവ ശക്തിപ്പെടുത്തുന്നതിനായി തയാറാക്കിയ ഈ ധാരണാപത്രത്തിലൂടെ ഇരു സ്ഥാപനങ്ങളും തമ്മിലുള്ള അക്കാദമിക-ശാസ്ത്രീയ സഹകരണം വിപുലീകരിക്കാനും
ഇരു സര്വകലാശാലകളുടെയും ആഗോളതലത്തിലുള്ള അനുഭവസമ്പത്ത് പുതിയ അറിവുകള് നേടാന് സഹായിക്കുമെന്നാണ് പ്രതീക്ഷ.
പ്രാരംഭഘട്ടത്തില് ഇരു സര്വകലാശാലകളും സംയുക്ത ബിരുദ കോഴ്സുകള് ആരംഭിക്കും. വിദ്യാര്ത്ഥി കൈമാറ്റം, സംയുക്ത ഗവേഷണങ്ങള്, ജേര്ണലുകള് പ്രസിദ്ധീകരിക്കുവാനുമുള്ള സൗകര്യങ്ങള്, സാങ്കേതിക സഹകരണം എന്നിവ ഉറപ്പു വരുത്തും. അമൃതയുടെ ശ്രദ്ധേയമായ ലിവ്-ഇന്-ലാബ്സ് പദ്ധതിയുമായും ഐഎംടി അറ്റ്ലാന്റിക്കിന് പങ്കാളിത്തമുണ്ടാകും. ഫ്രാന്സിലെ മികച്ച 10 സര്വകലാശാലകളിലൊന്നായ എലൈറ്റ് സാങ്കേതിക സര്വകലാശാലയാണ് ഐഎംടി അറ്റ്ലാന്റിക്. ഇന്ഡസ്ട്രി വിഭാഗത്തില് 115-ാമതാണ് ഐഎംടി അറ്റ്ലാന്റിക്കിന്റെ സ്ഥാനം.
