തിരുവനന്തപുരം: തൃക്കണ്ണാപുരത്ത് ആനന്ദ് തമ്പിയുടെ ആത്മഹത്യയുമായി ബന്ധപ്പെട്ട് ബി ജെപി സംസ്ഥാന അധ്യക്ഷന് രാജീവ് ചന്ദ്രശേഖറിനെ വിമര്ശിച്ച കോണ്ഗ്രസ് നേതാവ് കെ മുരളീധരന് മറുപടിയുമായി ബിജെപി സംസ്ഥാന ജനറല് സെക്രട്ടറി അഡ്വ. എസ്. സുരേഷ്.അച്ഛന്മാരുടെ തണലില് രാഷ്ട്രീയ നേതാവായ വ്യക്തിയല്ല രാജീവ് ചന്ദ്രശേഖര്. ലോകം മുഴുവന് അറിയപ്പെടുന്ന ടെക്നോക്രാറ്റ് എന്ന നിലയിലാണ് രാഷ്ട്രീയത്തില് വന്നത്. നരേന്ദ്രമോദി സര്ക്കാര് മന്ത്രിസഭയില് മന്ത്രിയായും പ്രവര്ത്തിച്ചയാളാണെന്ന കാര്യം കോണ്ഗ്രസ് മറന്ന് പോകുന്നു.
രാജീവ് ചന്ദ്രശേഖര് കേരള രാഷ്ട്രീയത്തിലേക്ക് വന്നത് കിങ്ങിണിക്കുട്ടനായിട്ടല്ല. . രാജീവ് ചന്ദ്രശേഖറിനെ വിമര്ശിക്കാന് കെ. മുരളീധരന് അഞ്ച് ജന്മം ജനിക്കേണ്ടിവരുമെന്നും എസ് സുരേഷ് പറഞ്ഞു.
പീഡനാരോപണ വിധേയനായ രാഹുല് മാങ്കൂട്ടത്തിന്റെ എംഎല്എ സ്ഥാനം രാജിവെപ്പിക്കാന് ധൈര്യം മുരളീധരനും കെപിസിസിക്കും ഉണ്ടോ? കോണ്ഗ്രസ് ഇന്നും രാഹുലിനെ ചുമന്നു നടക്കുകയല്ലേ. കോണ്ഗ്രസിന്റെ ഒരു എംപിയുടെ മകളെ പീഡിപ്പിച്ച രാഹുല് മാങ്കൂട്ടത്തെ രാജി വെയ്പ്പിക്കാന് മുരളീധരനായിട്ടുണ്ടോ. ഇങ്ങനെയുള്ളവര്ക്ക് ബിജെപിയെ വിമര്ശിക്കാന് എന്ത് ധാര്മ്മികതയാണ് ഉള്ളത്. മുരളീധരന് ചാരിത്ര്യ പ്രസംഗം നടത്തരുതെന്നും സുരേഷ് പറഞ്ഞു.
ഡിവൈഎഫ്ഐ നേതാവ് പത്തനംതിട്ടയില് എങ്ങനെ മരിച്ചു എന്ന് വി. ശിവന്കുട്ടി ഉത്തരം പറയണം. സിപിഎം ഓഫീസില് യുവതി ആത്മഹത്യ ചെയ്തത് ഞങ്ങള് ഓര്മ്മിപ്പിക്കണോ. ടി. പി. ചന്ദ്രശേഖറനെ കൊന്നവരാണ് സിപിഎം. മരിച്ചു വീഴുന്ന പ്രവര്ത്തകരുടെ ശവശരീരം വെച്ച് രാഷ്ട്രീയം കളിക്കാന് ബിജെപിയുടെ സംസ്കാരം അനുവദിക്കില്ല. പ്രവര്ത്തകരാണ് ഞങ്ങളുടെ മൂലധനം. അവരുടെ ജീവിതം വെച്ച് പന്താടുന്നവരല്ല തങ്ങളെന്നും സുരേഷ് കൂട്ടിച്ചേര്ത്തു.
