ശാരീരികമായി എന്ത് ബുദ്ധിമുട്ട് വരുമ്പോഴും ആളുകള് ചോദിക്കുന്ന ഒരു ചോദ്യമുണ്ട്- വിറ്റമിന്-ഡി കുറവാണോ ശരീരത്തില്. ഒരുപക്ഷേ അതാവും അസുഖത്തിന് കാരണം. കുറേ ഗുളിക വാങ്ങി കുറേക്കാലത്തേക്ക് കഴിക്കുക. വിറ്റാമിന് ഗുളിക ആയതിനാല് ആരോടും ചോദിക്കേണ്ട- ധൈര്യമായി തട്ടിക്കോളൂ!
വിറ്റാമിന്-ഡി. ശരീരത്തിന്റെ കൃത്യമായ വളര്ച്ചക്ക് അത്യന്താപേക്ഷിതമാണ്. എല്ലിനും പല്ലിനും അത്യാവശ്യം. തലച്ചോറിന്റെ പ്രവര്ത്തനത്തിന് കൂടിയേ തീരൂ. അധികം വന്ന കൊഴുപ്പിനെ അലിയിച്ചുകളയും. കാത്സ്യം ആഗിരണം ചെയ്യാന് സഹായിക്കും. അപ്പോള്പ്പിന്നെ കഴിച്ചു തുടങ്ങുകതന്നെ. പക്ഷേ അധികമായാല് അമൃതും വിഷമാണെന്ന് നാം മറക്കരുത്. ശരീരത്തില് വിറ്റമിന്-ഡി കുമിഞ്ഞുകൂടിയാല് അതൊരു വിഷാവസ്ഥ രൂപപ്പെടുത്തും. വിറ്റാമിന് ഡി ടോക്സിസിറ്റി. സംഗതി കുഴപ്പമാവുകയും ചെയ്യും…
അപ്പോള് രക്തത്തില് ഉയര്ന്ന അളവില് കാത്സ്യം അടിഞ്ഞുകൂടും. വൃക്കകളില് കല്ലുകള് രൂപപ്പെടും. ‘നെഫ്റോകാല്സിനോസ്’ എന്ന കാത്സ്യം നിക്ഷേപം അപകടാവസ്ഥയിലേക്ക് ഉയരും. ഹൃദയം,ശ്വാസകോശം, രക്തക്കുഴല് എന്നിവിടങ്ങളിലൊക്കെ ഇത്തരം കാത്സ്യം അധിനിവേശം ‘വിറ്റമിന് ഡി-ടോക്സിസിറ്റി’ മൂലം സംഭവിക്കും. പേശീ വീക്കവും ദഹനവ്യവസ്ഥയിലെ തകരാറും പിന്നാലെയെത്തും. അതിനൊക്കെപ്പുറമെ എല്ലുകളെ ദുര്ബലമാക്കുന്ന ‘ഹൈപ്പര് ഫോസ്ഫേറ്റിവിയ’യും രക്തത്തില് കാത്സ്യം അധികരിക്കുന്നതുമൂലമുണ്ടാകുന്ന ഹൈപ്പര് കാല്സിമിയയും കടന്നുവരും. ആകെ കുഴപ്പമാവും ആരോഗ്യം. വിറ്റമിന് ഡി വളരെ ചെറിയ അളവ് മതി നമ്മുടെ ശരീരത്തിന്. പക്ഷേ ആവശ്യമായതിന്റെ ആറും ഏഴും ഇരട്ടിയാണ് ഗുളികകള് ശരീരത്തില് അടിച്ചു കയറ്റുന്നത്. അതിനാല് വിറ്റമിന് -ഡി യെ സൂക്ഷിച്ചു മാത്രം ഉപയോഗിക്കുക. ശരീരത്തിലെ വിറ്റാമിന് ഡി സാന്നിദ്ധ്യം പരിശോധിക്കുക. ആവശ്യമാണെന്ന് ഉറപ്പാക്കി മാത്രം ‘ഡി’യെ അകത്താക്കുക. സൂര്യപ്രകാശത്തിലൂടെയും ഭക്ഷണത്തിലൂടെയും ഈ വിറ്റമിന് ശരീരത്തിലെത്തുമെന്ന് കുട്ടിക്കാലത്ത് കാണാതെ പഠിച്ചത് ഓര്ക്കുക.
ജന്മഭൂമി ഓണ്ലൈന്