പെരുമ്പാവൂര്‍: പ്രസിദ്ധമായ തോട്ടുവ ധന്വന്തരീഗ്രാമത്തില്‍ നൂറ്റാണ്ടുകള്‍ക്കു മുമ്പ് അന്യാധീനപ്പെട്ടുപോയ ഒരു ഭദ്രകാളീക്ഷേത്രമുണ്ടായിരുന്നു. സാഹിത്യകാരനായ മലയാറ്റൂരിന്റെ ജന്മഗൃഹത്തിനടുത്ത് ഇപ്പോഴത്തെ മംഗളഭാരതി ആശ്രമം റോഡിന്റെ പരിസരത്തായി പുതിയ ക്ഷേത്രം പണിയുന്നതിനുള്ള ആലോചനയിലാണ് തോട്ടുവ കൊരുമ്പൂര് മനയുടെ കീഴിലുള്ള ധന്വന്തരീമൂര്‍ത്തി സേവാ ട്രസ്റ്റ്.
ക്ഷേത്രാവശിഷ്ടങ്ങളും കാളീവിഗ്രഹവും മണ്ണില്‍ മൂടപ്പെട്ട നിലയിലുണ്ടെന്നാണ് ആദ്യഘട്ടത്തില്‍ ജ്യോത്സ്യന്‍ ഏഴക്കരനാട് അച്യുതന്‍ നായരുടെ നേതൃത്വത്തില്‍ നടത്തിയ താംബൂല പ്രശ്‌നത്തില്‍ കണ്ടെത്തിയത്. പരിഹാരക്രിയകള്‍ക്കുശേഷം വിശദമായ അഷ്ടമംഗലദേവപ്രശ്നം നടത്താനൊരുങ്ങുകയാണ് ട്രസ്റ്റ്. അതിനുശേഷമായിരിക്കും ക്ഷേത്രനിര്‍മാണത്തിന് തുടക്കമിടുക.
സ്വന്തം നാടിന്റെ ‘വേരുകള്‍’ സ്വന്തം നോവലിലൂടെ മലയാളികള്‍ക്കായി എഴുതിച്ചേര്‍ത്ത മലയാറ്റൂരിന്റെ മരുമകനായ, അന്തരിച്ച പാഞ്ചക്കാട്ട് മഠം വാസുദേവയ്യരുടെയും ഭാര്യ പരേതയായ ലളിതയുടെയും സ്മരണാര്‍ത്ഥം മകള്‍ തൊട്ടൂര്‍മഠം ജയശ്രീ ഗണപതിയാണ് ക്ഷേത്രനിര്‍മാണത്തിനായി 25 സെന്റ് സ്ഥലം ഇഷ്ടദാനമായി തോട്ടുവ ധന്വന്തരീമൂര്‍ത്തി സേവാട്രസ്റ്റിനു നല്‍കാന്‍ തയ്യാറായത്. കുടുംബസമേതം ഇവര്‍ വര്‍ഷങ്ങളായി ബഹ്റൈനില്‍ സ്ഥിരതാമസമാണ്. ജയശ്രീ ഗണപതിയ്‌ക്കുവേണ്ടി വസ്തുവിന്റെ പ്രമാണങ്ങള്‍ സഹോദരന്‍ അഡ്വ. ജയറാം സുബ്രഹ്‌മണിയും ഭാര്യ സൗമ്യലക്ഷ്മിയും ചേര്‍ന്ന് ട്രസ്റ്റ് സെക്രട്ടറി നാരായണന്‍ നമ്പൂതിരിയ്‌ക്കു കൈമാറി.
