തലക്കര ചന്തു: ദേശസ്‌നേഹത്തിന്റെ ജ്വലിക്കുന്ന നക്ഷത്രം

സുദീര്‍ഘമായ ഭാരത സ്വാതന്ത്ര്യ സമര ചരിത്രത്തിന് കേരളം നല്‍കിയ മഹത്തായ സംഭാവനകളിലൊന്നാണ് തലക്കര ചന്തുവിന്റെ ഐതിഹാസിക പോരാട്ടം. ബ്രിട്ടീഷുകാര്‍ക്കെതിരെയുള്ള പോരാട്ടത്തില്‍ വീരമ്യത്യുവരിച്ച ധീരനായ വനവാസി പോരാളിയായിരുന്നു തലക്കര ചന്തു.

ചന്തുവിന്റെ 220-ാമത് സ്മൃതിദിനാചരണവും, ബിര്‍സ മുണ്ട ജന്മദിനവും ‘ഗൗരവ് ദിവസ്’ എന്ന പേരില്‍ ഇന്ന് സമുചിതമായി ആചരിക്കുകയാണ്.

പഴശ്ശിരാജയുടെ കുറിച്യപ്പടയുടെ തലവനായിരുന്നു തലക്കര ചന്തു. വയനാടന്‍ കാടുകളില്‍ ബ്രിട്ടിഷ് പട്ടാളവുമായുള്ള ഒളിപ്പോര്‍ യുദ്ധത്തില്‍ വൈദേശിക സൈന്യത്തെ വിറകൊള്ളിച്ചത് ചന്തുവിന്റെ സേനയായിരുന്നു.

പേരിയ, പനമരം യുദ്ധങ്ങള്‍ ഇന്നും സ്വാതന്ത്ര്യസമരചരിത്രത്തിലെ അറിയപ്പെടാത്ത ഏടുകളായി നിലനില്‍ക്കുന്നു. വയനാട്ടിലെ കാര്‍ഷികോല്‍പ്പന്നങ്ങള്‍ക്ക് അമിത നികുതി ചുമത്തി ചൂഷണം ചെയ്യാനായിരുന്നു ഈസ്റ്റിന്ത്യാ കമ്പനിയുടെ നീക്കം. കര്‍ഷകര്‍ക്കിടയില്‍ ഈ നീക്കം വലിയ എതിര്‍പ്പുണ്ടാക്കി. പഴശ്ശിരാജയോടൊപ്പം ബ്രിട്ടീഷുകാര്‍ക്കെതിരെ യുദ്ധം ചെയ്തുകൊണ്ടിരുന്ന എടച്ചന കുങ്കനുമായി കുറിച്യര്‍ ഒരുമിച്ചു. തലക്കര ചന്തുവും എടച്ചന കുങ്കനും 175 കുറിച്യ വില്ലാളികളടക്കമുള്ള ഗോത്ര സേന, 1802 ഒക്ടോബര്‍ 11ന് പനമരത്തെ ബ്രിട്ടീഷ് കോട്ട പിടിച്ചെടുത്തു. കമാന്റിങ്ങ് ഓഫീസര്‍ ക്യാപ്റ്റന്‍ ഡിക്കിന്‍സണും ലെഫ്. മാക്‌സ്വെല്ലും ഉള്‍പ്പെടെ കോട്ടയിലുണ്ടായിരുന്ന 70 പട്ടാളക്കാര്‍ കൊല്ലപ്പെട്ടു. പഴശ്ശിരാജയുടെ ഒന്നാം പടത്തലവനായി തലക്കര ചന്തു മാറി. പഴശ്ശിരാജയുടെ ഉറ്റസഹയാത്രികനുമായിരുന്നു ചന്തു.

‘എല്ലാ നായന്മാരും എന്നെ വിട്ടു പോയാലും കുറിച്യരുണ്ടെങ്കില്‍ ഞാന്‍ പിന്നേയും ബ്രിട്ടീഷുകാരോട് പൊരുതുമെന്ന്’ പഴശ്ശി രാജ പറഞ്ഞതായി ചരിത്രമുണ്ട്. പുല്‍പ്പള്ളിയില്‍ വെച്ച് തലക്കര ചന്തുവിനെ ബ്രിട്ടീഷ് സേന പിടികൂടി. ചന്തുവിനെ പനമരത്തെത്തിച്ച് ഗളച്ഛേദം ചെയ്തു. 1805 നവംബര്‍ 15നായിരുന്നു ഈ വീരയോദ്ധാവിന്റെ അന്ത്യം.

ചരിത്രത്തില്‍ സ്വജീവിതം കൊണ്ട് വീരേതിഹാസം രചിച്ച തലക്കര ചന്തുവിന്റെ സ്മരണയ്‌ക്കായി ഇന്ന് നിലനില്‍ക്കുന്നത് പനമരം ഗവ.ഹയര്‍സെക്കന്ററി സ്‌കൂളിന് പിന്നിലുള്ള ഒരു കോളിമരവും അതിനടുത്ത് പേരിന് ഒരു സ്മാരകവും മാത്രമാണ്. വീരപഴശ്ശിയുടെ ഓര്‍മ്മകളോടൊപ്പം സ്മരിക്കപ്പെടേണ്ട ചരിതമാണ് തലക്കരചന്തുവിന്റേതും. എന്നാല്‍ ജനാധിപത്യ കേരളം ഈ വീരപോരാളിയേയും അര്‍ഹമായ രീതിയില്‍ പരിഗണിക്കുന്നില്ല.

ബലിദാനത്തിന്റെ ഇരുനൂറ്റി ഇരുപതാം വാര്‍ഷികത്തില്‍ സ്വാതന്ത്ര്യ ബോധത്തിന്റെയും ദേശസ്‌നേഹത്തിന്റെയും ജ്വലിക്കുന്ന നക്ഷത്രമായി തലക്കര ചന്തുവിന്റെ ഓര്‍മ്മകള്‍ നിറയുകയാണ്.

അദ്ദേഹം വീരമ്യത്യു വരിച്ച വയനാട്ടിലെ പനമരത്ത് കോളിമരച്ചുവട്ടില്‍ തലക്കര ചന്തുവിന്റെ സ്മൃതിദിനാചരണം നടക്കുന്നു. രാവിലെ 9 മണിക്ക് തലക്കര ചന്തു സ്മൃതി മണ്ഡലത്തിലേക്ക് സ്മൃതിയാത്ര ആരംഭിക്കും. തുടര്‍ന്ന് പുഷ്പാര്‍ച്ചനയും സ്മൃതി സമ്മേളനവും നടക്കും. വയനാട്ടിലെ സാമൂഹ്യ സാംസ്‌കാരിക രാഷ്‌ട്രീയ മേഖലകളിലെ നിരവധി വ്യക്തിത്വങ്ങള്‍ പരിപാടിയില്‍ പങ്കെടുക്കും.