കോട്ടയം: നാട്ടകം ഗവ. കോളജിലെ കെമിസ്ട്രി വിഭാഗം അദ്ധ്യാപിക, ഭിന്നശേഷിക്കാരിയായ ഷോമാ ജോസഫ് സഹപ്രവര്ത്തകരില് നിന്ന് ക്രൂരമായ അവഹേളനവും മാനസിക പീഡനവും നേരിടുകയാണെന്ന് ആരോപിച്ച് പ്രിന്സിപ്പലിനും ഭിന്നശേഷി കമ്മീഷനിലും പരാതി നല്കി.
ഷോമ പാലക്കാട് നിന്ന് സ്ഥലംമാറിയാണ് നാട്ടകം ഗവ. കോളജിലേക്ക് വന്നത്. ഇവിടെ ജോയിന് ചെയ്തത് മുതല് അവഹേളനമാണ്. ഏറെനാളായി സ്ഥലംമാറ്റമൊന്നും ഇല്ലാത്ത, സഹ അദ്ധ്യാപകന് എന്. മനുകുമാറാണ്, വ്യക്തിവിരോധം ഉയര്ത്തുന്നതും അവഹേളിക്കുന്നതുമെന്ന് പരാതിയില് പറയുന്നു. കോളേജിലെ ശുചിമുറിയില് പൂട്ടിയിടുന്നതില് വരെ കാര്യങ്ങളെത്തി. അനദ്ധ്യാപകരുടെ സമയോചിതമായ ഇടപെടലിലാണ് അപായമുണ്ടാകാതിരുന്നത്. അതിനെതിരെ പരാതി നല്കിയപ്പോള് ആരോപണ വിധേയനായ അദ്ധ്യാപകന് സുഹൃത്തുക്കള് വഴി അനുരഞ്ജന ചര്ച്ച നടത്തി അദ്ധ്യാപികയെ പിന്തിരിപ്പിച്ചു.
പ്രിന്സിപ്പല് ഇന് ചാര്ജായിരുന്ന അദ്ധ്യാപകന് സഹ അദ്ധ്യാപകരുടെ പ്രവര്ത്തികള് കണ്ടില്ലെന്നു നടിച്ച് അവഹേളനവും മാനസിക പീഡനവും തുടരാന് വഴിയൊരുക്കി. കോളേജിലെ പൊതുപരിപാടികളില് നിന്നെല്ലാം അകറ്റിനിര്ത്തി, തുടര്ച്ചയായ ബോഡി ഷെയിമിങ്ങിനും വിധേയയായി. രാഷ്ട്രീയതാല്പര്യങ്ങള് കണക്കിലെടുത്തുള്ള അദ്ധ്യാപകരുടെ കരാര് നിയമനം ചോദ്യം ചെയ്തതോടെ ശത്രുത വര്ധിച്ചു, ശാരീരിക മാനസിക പീഡനങ്ങള് കൂടി. അധികം നാള് ഇവിടെ വാഴാന് നിന്നെ അനുവദിക്കില്ലന്നായി ഭീഷണി.
മാനസികമായി തളര്ന്ന അദ്ധ്യാപിക, ശാരീരിക ആക്രമണം ഉണ്ടായേക്കുമെന്നും ഭയക്കുന്നു. കോളേജ് പ്രിന്സിപ്പലിന് നല്കിയ പരാതിയില് തിങ്കളാഴ്ച ഹിയറിങ് നടക്കും. യുജിസി, ദേശീയ വനിതാ ശിശുക്ഷേമ മന്ത്രാലയം, ദേശീയ ഭിന്നശേഷി വകുപ്പ് എന്നിവിടങ്ങളിലും പരാതി നല്കാനുള്ള തയാറെടുപ്പിലാണ് അദ്ധ്യാപിക.
