ന്യൂദല്ഹി: പുല്വാമ ഭീകരാക്രമണ കേസിലെ മുഖ്യ സൂത്രധാരന്റെ ഭാര്യയും ജെയ്ഷെ മുഹമ്മദ് വനിതാ ബ്രിഗേഡില്. ജെയ്ഷെ കമാന്ഡറായ ഉമര് ഫറൂഖിന്റെ ഭാര്യ അഫീറ ബീബിയാണ് വനിതാ ബ്രിഗേഡില് ചേര്ന്നത്. 2019ലെ പുല്വാമ ആക്രമണത്തിന് ശേഷമുണ്ടായ ഏറ്റുമുട്ടലില് ജെയ്ഷെ തലവന് മസൂദ് അസറിന്റെ അനന്തരവന് ഉമര് ഫറൂഖ് കൊല്ലപ്പെട്ടിരുന്നു.
ജെയ്ഷെ പുതുതായി ആരംഭിച്ച വനിതാ ബ്രിഗേഡായ ജമാഅത്ത്-ഉല്-മോമിനാത്തിന്റെ പ്രധാന മുഖമായിരുന്നു ഉമറിന്റെ ഭാര്യ അഫീറ ബീബി എന്നാണ് റിപ്പോര്ട്ടുകള് വ്യക്തമാക്കുന്നത്.
ദല്ഹിയിലെ സ്ഫോടനത്തിന് ആഴ്ചകള്ക്ക് മുമ്പ്, അഫീറ ബ്രിഗേഡിന്റെ ഉപദേശക സമിതിയായ ഷൂറയില് ചേര്ന്നു. മസൂദ് അസറിന്റെ ഇളയ സഹോദരി സാദിയ അസ്ഹറിനൊപ്പമാണ് അഫീറ പ്രവര്ത്തിച്ചിരുന്നത്. ഇരുവരും ഷഹീന് ഷാഹിദുമായി ബന്ധപ്പെട്ടിരുന്നുവെന്നാണ് ഔദ്യോഗിക വൃത്തങ്ങള് സൂചിപ്പിക്കുന്നത്.
ഒക്ടോ. എട്ടിനാണ് വനിതാ ബ്രഗേഡ് രൂപികരിക്കുന്നതായി മസൂദ് അസര് പ്രഖ്യാപിച്ചത്. അതിനോടനുബന്ധിച്ച് സ്ത്രീ വിഭാഗത്തെ ശക്തിപ്പെടുത്തുന്നതിനായി ഷഹീന് ഷാഹിദ് ഉള്പ്പെടെയുള്ളവര് സജീവ പ്രവര്ത്തനം നടത്തിയിരുന്നു. 2019 ഫെബ്രുവരി 14 നായിരുന്നു പുല്വാമയില് ഭീകരാക്രമണം. അഫീറ ബീബിയുടെ ഭര്ത്താവ് ഉമര് ഫറൂഖാണ് ആക്രമണത്തിന്റെ മുഖ്യ സൂത്രധാരന്. സ്ഫോടകവസ്തുക്കള് നിറച്ച വാഹനം സിആര്പിഎഫിന്റെ വാഹനവ്യൂഹത്തിന് നേരെ ഓടിച്ചുകയറ്റുകയായിരുന്നു. 40 സൈനികരാണ് ഭീകരാക്രമണത്തില് വീരമൃത്യു വരിച്ചത്. തുടര്ന്ന് കശ്മീരിലെ ഡാച്ചിഗാം നാഷണല് പാര്ക്കില് സൈന്യവും ഭീകരരും തമ്മിലുണ്ടായ ഏറ്റുമുട്ടലില് ഉമര് ഫറൂഖ് വെടിയേറ്റ് മരിക്കുകയായിരുന്നു.
