തിരുവനന്തപുരം: കേരള കേന്ദ്ര സര്വകലാശാലയുടെ തിരുവനന്തപുരത്തെ പ്രദേശിക കേന്ദ്രത്തിനും കാമ്പസിനും സ്ഥലം അനുവദിക്കാനുള്ള ഫയലില് തീരുമാനമെടുക്കാതെ ഉന്നത വിദ്യാഭ്യാസമന്ത്രി ഡോ. ആര്. ബിന്ദു. റവന്യൂ, ധന വകുപ്പുകള് അനുമതി നല്കിയ ഭൂമി കൈമാറ്റത്തിനുള്ള അപേക്ഷ മന്ത്രിയുടെ ഓഫീസില് കെട്ടിക്കിടക്കാന് തുടങ്ങിയിട്ട് ഒരുവര്ഷം. ഇതോടെ കേന്ദ്ര സര്വകലാശാലയുടെ പ്രാദേശിക പഠന കേന്ദ്രം കാപ്പിറ്റല് സെന്ററിന്റെ പ്രവര്ത്തനം പോലും നിലയ്ക്കുന്ന അവസ്ഥ.
2014 ജനുവരി നാലിന് പ്രധാനമന്ത്രി മന്മോഹന്സിങ് ആണ് പട്ടം മരപ്പാലത്തുള്ള ബിഎസ്എന്എല്ലിന്റെ വാടക കെട്ടിടത്തില് കാപിറ്റല് സെന്റര് ഉദ്ഘാടനം ചെയ്തത്. അന്നു പ്രാദേശിക പഠന കേന്ദ്രത്തിന് ഭൂമി അനുവദിക്കാനുള്ള തീരുമാനം സംസ്ഥാന സര്ക്കാര് കൈക്കൊണ്ടു. ഉമ്മന്ചാണ്ടി സര്ക്കാര്, കുടപ്പനക്കുന്നില് അഞ്ച് ഏക്കര് ഭൂമി നല്കാന് ക്യാബിനറ്റ് തീരുമാനവും എടുത്തു. എന്നാല് 2016 ല് പിണറായി വിജയന് സര്ക്കാര് അധികാരത്തില് വന്നതോടെ തീരുമാനം അട്ടിമറിച്ചു. കുടപ്പനക്കുന്നില് സ്ഥലം അനുവദിക്കാന് കഴിയില്ല എന്ന് 2017 ല് കേന്ദ്രസര്വകലാശാലയെ അറിയിച്ചു. പിന്നാലെ നിരവധി തവണ കേന്ദ്രസര്വകലാശാല സംസ്ഥാന സര്ക്കാരിനെ നിരന്തരമായി ആവശ്യം അറിയിച്ചു.
വിതുര ഐസറിന് സമീപം സ്ഥലം അനുവദിക്കാമെന്ന് പറഞ്ഞെങ്കിലും ഫോറസ്റ്റിന്റെ അനുമതിയില്ലെന്ന് ചൂണ്ടിക്കാട്ടി ഒഴിവാക്കി. വട്ടപ്പാറ, അഴൂര് തുടങ്ങിയ സ്ഥലങ്ങള് നിര്ദേശിച്ചെങ്കിലും സാങ്കേതിക കാരണങ്ങളാല് മുടങ്ങി. ഒടുവില് നെടുമങ്ങാട് മണ്ഡലത്തിലുള്ള ആണ്ടൂര്ക്കോണത്ത് 12.95 ഹെക്ടര് സ്ഥലം അനുവദിക്കാന് റനവ്യൂ വകുപ്പ് അനുമതി നല്കി. 2024 ജൂണ് 21 മുതല് റവന്യൂ, ഫിനാന്സ് വകുപ്പുകളില് 153 തവണ ഫയല് സഞ്ചരിച്ചു. ആറ് മാസത്തിന് ശേഷം 2025 ജനുവരി 30 ന് ഫയല് ഉന്നത വിദ്യാഭ്യാസ വകുപ്പിന്റെ മുന്നിലെത്തി. അവിടെ നിന്നും ഫയല് ഒരിഞ്ച് അനങ്ങിയിട്ടില്ല. ഫയലില് ഉന്നതവിദ്യാഭ്യാസ മന്ത്രിയുടെ അഭിപ്രായം മാത്രം രേഖപ്പെടുത്തിയാല് മതി. എന്നാല് വര്ഷം ഒന്നാകുമ്പോഴും ഫയലില് അഭിപ്രായം രേഖപ്പെടുത്താന് വിദ്യാഭ്യാസ മന്ത്രി തയാറായിട്ടില്ല.
ഇതോടെ പ്രാദേശിക കേന്ദ്രത്തിന്റെ പ്രവര്ത്തനം അവതാളത്തിലാണ്. കേന്ദ്രസര്വകലാശാലയില് നാലുവര്ഷ ബിരുദ കോഴ്സുകള് ആരംഭിച്ചിട്ടുണ്ട്. അടുത്ത അധ്യയന വര്ഷം മുതല് അധികമായി വേണ്ടിവരുന്ന ക്ലാസ് മുറികള് നിലവിലെ കെട്ടിടത്തില് ലഭ്യമല്ല. ഇതോടെ ക്ലാസുകള് തുടങ്ങാനാകാത്ത അവസ്ഥയാണ്. കേന്ദ്ര സര്വകലാശാലയുടെ കാപിറ്റല് സെന്ററില് അയ്യങ്കാളി സ്റ്റഡിസെന്ററിന് അനുമതി ലഭ്യമായി കിടക്കുകയാണ്. അതും തുടങ്ങാനാകാത്ത അവസ്ഥയാണ്. ഉന്നത വിദ്യാഭ്യാസ രംഗത്ത് കേരളം ലോകത്തിന് മാതൃകയെന്ന് അവകാശപ്പെടുമ്പോഴാണ് ഭൂമി അനുവദിക്കാതെ കേന്ദ്ര സര്വകലാശാലയെ സംസ്ഥാന സര്ക്കാര് ബുദ്ധിമുട്ടിക്കുന്നത്.
