ഭോപാല്: ഹരിയാനയില് ആകെ രണ്ട് കോടി വോട്ടര്മാരാണ് ഉള്ളത്. ഇതില് 25 ലക്ഷം വ്യാജവോട്ടര്മാരാണെന്നും അതില് തന്നെ 5.21 ലക്ഷം ഇരട്ടവോട്ടുകളും ഉണ്ടെന്നായിരുന്നു രാഹുല് ഗാന്ധി ബുധനാഴ്ച നടത്തിയ വാര്ത്താസമ്മേളനത്തില് ഉയര്ത്തിയ ‘വോട്ട് ചോരി’ ആരോപണം. അതുകൊണ്ട് എട്ട് സീറ്റുകളില് കോണ്ഗ്രസ് തോറ്റതിനാല് ഹരിയാന കൈവിട്ടു എന്നാണ് രാഹുല് ഗാന്ധിയുടെ ആരോപണം.
കോണ്ഗ്രസുകാര്ക്ക് ഹരിയാനയില് ഇത്രയ്ക്ക് സ്വാധീനം ഉണ്ടെങ്കില് വോട്ടര്പട്ടിക തയ്യാറാക്കുമ്പോള് തന്നെ ഇത് കണ്ടെത്തുമായിരുന്നില്ലേ എന്നാണ് ഇതിനെതിരെ ഉയരുന്ന ചോദ്യം. വോട്ടര് പട്ടിക വെറുതെ ഉണ്ടാകുന്നതല്ല, അത് പ്രസിദ്ധീകരിച്ച ശേഷം രാഷ്ട്രീയ പാര്ട്ടികള് അത് കൂലങ്കഷമായി പഠിക്കും. ബൂത്ത് തലങ്ങളില് തന്നെ പരിശോധന നടക്കും. എന്നിട്ട് അതില് പരാതികള് ഉണ്ടെങ്കില് അപ്പപ്പോള് അത് തെരഞ്ഞെടുപ്പ് കമ്മീഷനെ അറിയിക്കും. അത് തെരഞ്ഞെടുപ്പ് കമ്മീഷന് തിരുത്തി എന്ന കാര്യം രാഷട്രീയ പാര്ട്ടികള് ഉറപ്പുവരുത്തും.
എന്തിന് വോട്ടിംഗ് ദിവസം പോലും ബൂത്ത് തല പ്രവര്ത്തകര് അതത് വാര്ഡുകളിലെ വോട്ടര്മാരെ കൃത്യമായി അടയാളപ്പെടുത്തിയിട്ടുണ്ടാകും. വോട്ട് ചെയ്യാനുള്ള സ്ലിപ് വിതരണം ചെയ്യുന്നത് അങ്ങിനെയാണ്. അപ്പോഴൊന്നും രാഹുല് ഗാന്ധിയുടെ കോണ്ഗ്രസുകാര്ക്ക് 25 ലക്ഷം കള്ളവോട്ടര്മാരെയും 5.21 ലക്ഷം ഇരട്ടവോട്ടര്മാരെയും കണ്ടുപിടിക്കാന് കഴിഞ്ഞില്ലേ എന്നാണ് ചോദ്യം ഉയരുന്നത്. ഇങ്ങിനെ ഒരു കോണ്ഗ്രസും കൊണ്ട് നടക്കുന്നത് എന്തിന് എന്ന ചോദ്യം ഉയരുകയാണ്. ഇത്രയും കഴിവുകെട്ട ഒരു രാഷ്ട്രീയ പാര്ട്ടി പിരിച്ചുവിട്ടുകൂടെ എന്നും ചോദ്യം ഉയരുന്നു.
