ന്യൂദല്ഹി: കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ സ്വസ്ത് നാരി, സശക്ത് പരിവാര് അഭിയാന് പദ്ധതിക്ക് മൂന്ന് ഗിന്നസ് ലോക റിക്കാര്ഡുകള്.
ഒരു മാസത്തിനുള്ളില് ഏറ്റവും കൂടുതല് പേര് അംഗങ്ങളായ ആരോഗ്യ സംരക്ഷണ പദ്ധതി (3,21,49,711 പേര്), ഒരാഴ്ചയ്ക്കുള്ളില് ഏറ്റവും കൂടുതല് പേര് സ്തനാര്ബുദ പരിശോധനക്ക് രജിസ്റ്റര് ചെയ്ത പദ്ധതി (9,94,349 പേര്), സംസ്ഥാനതലത്തില് ഒരാഴ്ചക്കുള്ളില് ഏറ്റവും കൂടുതല് പേര് രജിസ്റ്റര് ചെയ്ത പദ്ധതി (1,25,406 പേര്) എന്നീ മേഖലകളിലാണ് ഗിന്നസ് റിക്കാര്ഡ് നേടിയത്.
പ്രധാനമന്ത്രി നരേന്ദ്രമോദി നേട്ടത്തെ അഭിനന്ദിച്ചു. ഇത്തരം നേട്ടങ്ങള് സ്ത്രീശാക്തീകരണ ശ്രമങ്ങള്ക്ക് കൂടുതല് പ്രചോദനം നല്കുകയും സ്ത്രീശക്തിയില് പരിവര്ത്തനാത്മക സ്വാധീനം ചെലുത്തുകയും ചെയ്യുമെന്ന് അദ്ദേഹം അഭിപ്രായപ്പെട്ടു. സ്ത്രീകളുടെ ആരോഗ്യ ശാക്തീകരണത്തിലെ ഒരു നാഴികക്കല്ലാണ് പദ്ധതിയെന്ന് കേന്ദ്ര ആരോഗ്യമന്ത്രി ജെ.പി. നഡ്ഡ പറഞ്ഞു.
സപ്തം. 17 മുതല് ഒക്ടോ. 2 വരെ നീണ്ടുനിന്ന പദ്ധതിക്ക് പ്രധാനമന്ത്രി നരേന്ദ്രമോദിയാണ് തുടക്കംകുറിച്ചത്. 11 കോടിയിലധികം പേരാണ് പദ്ധതിയുടെ ഭാഗമായത്. രാജ്യത്തെ സ്ത്രീകള്, കൗമാരക്കാരായ പെണ്കുട്ടികള്, കുട്ടികള് എന്നിവരുടെ ആരോഗ്യവും പോഷകാഹാരവും മെച്ചപ്പെടുത്തുക, നേരത്തെയുള്ള കണ്ടെത്തല് ഉറപ്പാക്കുക, അവശ്യ ആരോഗ്യ സംരക്ഷണം ഉറപ്പാക്കുക, ആരോഗ്യകരമായ ഒരു ഭാരതത്തിനായി കുടുംബങ്ങളെ ശാക്തീകരിക്കുക എന്നിവയിലാണ് പദ്ധതി ശ്രദ്ധകേന്ദ്രീകരിച്ചത്.
