കൊച്ചി: സംസ്ഥാനത്ത് നവംബറില്‍ മഴ കൂടുമെന്ന് കേന്ദ്ര അന്തരീക്ഷ ശാസ്ത്രകേന്ദ്രം. നേരത്തെ തന്നെ തുലാമഴയില്‍ വര്‍ദ്ധനവുണ്ടാകുമെന്ന് ഐഎംഡി അറിയിച്ചിരുന്നു. തമിഴ്‌നാട് പോലുള്ള ചുരുക്കം ചില സംസ്ഥാനങ്ങളിലൊഴികെ രാജ്യത്തെമ്പാടും ഈ മാസം മഴയുടെ അളവില്‍ വര്‍ദ്ധനവുണ്ടാകും.
പകല്‍ സമയത്തെ കൂടിയ താപനിലയില്‍ കുറവുണ്ടാകുമെന്ന ആശ്വാസകരമായ അറിയിപ്പും ഇതിനൊപ്പമുണ്ട്. എന്നാല്‍ രാത്രി സമയത്തെ കുറഞ്ഞ താപനില (തണുപ്പ്) ശരാശരിയേക്കാള്‍ കൂടുതലായിരിക്കുമെന്നാണ് പ്രവചനം. 2025 നവംബര്‍-ഡിസംബര്‍ മാസങ്ങളില്‍ ലാ നിന തുടരുമെന്നും വരും മാസങ്ങളില്‍ ഇന്ത്യന്‍ മഹാസമുദ്രത്തില്‍ നെഗറ്റീവ് ഐഒഡി ദുര്‍ബലമാകുമെന്നുമാണ് വിവിധ മോഡലുകള്‍ പ്രവചിക്കുന്നത്.
ന്യൂനമര്‍ദവും ചുഴലിക്കാറ്റും മൂലം കഴിഞ്ഞ രണ്ടാഴ്ചയോളമായി സംസ്ഥാനത്ത് ഇടവിട്ട് ശക്തമായ മഴ തുടര്‍ന്നിരുന്നു. പിന്നീട് മഴയുടെ ശക്തികുറഞ്ഞതോടെ രാത്രിസമയങ്ങളില്‍ തണുപ്പേറി. എന്നാല്‍ പകല്‍ 32 ഡിഗ്രിക്ക് മുകളിലാണ് പലയിടങ്ങളിലും താപനില. രാത്രിയിലിത് 22 മുതല്‍ 24 ഡിഗ്രി വരെയായി കുറയുന്നുണ്ട്. മലയോര മേഖലകളില്‍ 15 ഡിഗ്രിക്ക് താഴെ വരെ താപനിലയെത്തുന്നുണ്ട്.
തുലാമഴയില്‍ ഇതുവരെ 10 ശതമാനം കുറവാണുള്ളത്. 13 ദിവസം ശരാശരിയില്‍ കൂടുതല്‍ മഴ കിട്ടി. ഏറ്റവും കൂടുതല്‍ മഴ കിട്ടിയത് ഒക്ടോ. 22 നാണ്. ആകെ 30.64 സെ.മീ. ലഭിക്കേണ്ട സ്ഥാനത്ത് 27.6 സെ.മീ. മഴ ലഭിച്ചു. ഇടുക്കിയില്‍ 27 ശതമാനം മഴ കുറഞ്ഞപ്പോള്‍ തിരുവനന്തപുരത്ത് 27 ശതമാനം മഴ കൂടി. മലപ്പുറം-21, കൊല്ലം- 21, ആലപ്പുഴ- 19 എറണാകുളം 10 ശതമാനവും മഴ കുറഞ്ഞു. ഒക്ടോ. 1 മുതല്‍ ഡിസം. 31 വരെയുള്ള സീസണിലാകെ 49 സെ.മീ. മഴയാണ് ലഭിക്കേണ്ടത്. കഴിഞ്ഞ ഏതാനം വര്‍ഷമായി ശരാശരിയോ അതില്‍ കൂടുതലോ തുലാമഴ ലഭിക്കാറുണ്ട്. നിലവിലെ സാഹചര്യത്തില്‍ നാലാം തിയതി വരെ സംസ്ഥാനത്ത് കാര്യമായ മഴ സാധ്യതയില്ല.
