പാലക്കാട്: ജില്ലയിലെ വിവിധ ബാങ്കുകളില്‍ അവകാശികളില്ലാതെ കിടക്കുന്നത് 126.54 കോടി രൂപ. 5.76 ലക്ഷം അക്കൗണ്ടുകളിലായാണ് കോടികളുടെ നിക്ഷേപമുള്ളത്. റിസര്‍വ് ബാങ്കിന്റെ നിയന്ത്രണത്തിലുള്ള ബാങ്കുകളിലെ വിവരമാണിത്.
രാജ്യവ്യാപകമായി 1.82 ലക്ഷം കോടി രൂപയും കേരളത്തില്‍ 2133.72 കോടി രൂപയുമാണ് ഇത്തരത്തില്‍ അവകാശികളില്ലാതെ ബാങ്ക് അക്കൗണ്ടുകളിലുള്ളത്.
പത്തുവര്‍ഷത്തിലധികമായി ഒരു ഇടപാടുപോലും നടക്കാത്ത അക്കൗണ്ടുകളാണ് അവകാശികളില്ലാത്ത അക്കൗണ്ടായി പരിഗണിക്കുക. നിക്ഷേപകര്‍ മരിച്ചുപോകുക, വിദേശത്ത് പോകുക തുടങ്ങിയ കാരണങ്ങളാല്‍ അക്കൗണ്ടുകളില്‍ ഇടപാടുകള്‍ മുടങ്ങാറുണ്ട്. ചിലരുടെ അനന്തരാവകാശികള്‍ക്കും അക്കൗണ്ടിനെക്കുറിച്ചറിവുണ്ടാവില്ല എന്നതാണ് വസ്തതുത.
അവകാശികളെ കണ്ടെത്തി നിക്ഷേപം തിരിച്ചേല്‍പ്പിക്കാനായി ധനകാര്യമന്ത്രാലയത്തിന്റെ കീഴിലുള്ള ധനകാര്യവകുപ്പ് ‘നിങ്ങളുടെ പണം നിങ്ങളുടെ അവകാശം’ എന്ന പേരില്‍ ക്യാമ്പ് സംഘടിപ്പിക്കുന്നു. ലീഡ് ബാങ്കിന്റെ നേതൃത്വത്തില്‍ നവംബര്‍ മൂന്നിന് രാവിലെ 10ന് ജില്ലാ പഞ്ചായത്ത് ഹാളിലാണ് ക്യാമ്പ്. നിക്ഷേപത്തിന്റെ അവകാശികളാണെന്ന് തെളിയിക്കുന്ന രേഖകള്‍ ക്യാമ്പിലെത്തുന്നവരുടെ കൈയ്യിലുണ്ടായിരിക്കണം.
ബാങ്കുകള്‍, ഇന്‍ഷുറന്‍സ് കമ്പനികള്‍, മ്യൂച്ചല്‍ ഫണ്ട് സ്ഥാപനങ്ങള്‍, പെന്‍ഷന്‍ ഫണ്ടുകള്‍, ഫിനാന്‍ഷ്യല്‍ ലിറ്ററിസി സെന്ററുകള്‍ എന്നിവയുടെ സഹായ കൗണ്ടറുകളും ഉണ്ടാവും. അവകാശികളില്ലാത്ത നിക്ഷേപങ്ങളെക്കുറിച്ച് ബാങ്ക് രേഖകള്‍ പ്രകാരമുള്ള വിലാസത്തില്‍ അന്വേഷണം നടത്തി അറിയിപ്പ് നല്‍കാറുണ്ട്. ഇത് സാധ്യമാകാത്ത അക്കൗണ്ടുകളിലെ പണം നല്‍കുന്നതിനാണ് ക്യാമ്പ് നടത്തുന്നത്. തുടര്‍ നടപടികള്‍ക്കായി എല്ലാ ബാങ്കുകളിലും സഹായ കേന്ദ്രങ്ങള്‍ പ്രവര്‍ത്തിക്കും.
