കേരളം എന്നും കളികളെയും കളിലോകത്തെയും ശിരസ്സിലേറ്റുന്നവരുടെ നാടാണെന്നത് അംഗീകരിക്കപ്പെട്ട യാഥാര്ഥ്യം ആണല്ലോ. കളി പ്രേമം പക്ഷെ അതിന് അനുസൃതമായ നിലയില് മികവിന്റെയും നേട്ടങ്ങളുടെയും നിലയിലേയ്ക്ക് ഉയര്ന്നിട്ടുണ്ടോ എന്ന സംശയവും സജീവമായി നിലനില്ക്കുന്നുണ്ട്. നേട്ടങ്ങള് പലതുണ്ടെങ്കിലും അര്ഹമായ നിലയിലേയ്ക്ക് അതിനെ ഉയര്ത്താന് നമുക്ക് കഴിയാതെ പോകുന്നതിനു കാരണം കായിക ഭരണത്തിന്റെ പോരായ്മയും അഴിമതിയും കെടുകാര്യസ്ഥതയും ആണെന്ന ആരോപണം കാലങ്ങളായി നിലനില്ക്കുന്നതാണ്. അതിന് ബലമേകുന്ന അനുഭവങ്ങള് പലതുണ്ടുതാനും. പക്ഷെ, തന്കാര്യവും പണക്കൊയ്ത്തും ലക്ഷ്യം വച്ചു നാടിന്റെ കളിക്കമ്പത്തെ വിറ്റു കാശാക്കാനുള്ള ശ്രമം പുതിയ അനുഭവമാണ്. അതാണ്, ലോക ഫുട്ബോള് താരം ലയണല് മെസ്സിയുടെ കേരളത്തിലേക്കുള്ള വരവെന്ന പേരില് കായികമന്ത്രി അടക്കമുള്ളവര് ഇവിടെ കാട്ടിക്കൂട്ടിയത്. മെസ്സി വരും എന്ന് ആണയിട്ടവര് ഇപ്പോള് വരില്ല എന്ന് പറഞ്ഞാല് മാത്രം പ്രശ്നം തീരില്ല.
എന്ത് ന്യായീകരണം നിരത്തിയാലും ഈ കാണിച്ചത് കേരളത്തിന്റെ കായിക സ്നേഹത്തിന്റെ മുഖത്തു തുപ്പുന്നത് പോലെയായിപ്പോയി. നടക്കില്ലെന്നു തുടക്കത്തിലെ വ്യക്തമായിരുന്ന കാര്യം, നടത്തുമെന്ന് ഉറപ്പിച്ചു പ്രഖ്യാപിക്കുകയും അതിലേക്ക് എടുത്തു ചാടുകയും ചെയ്ത കായികമന്ത്രിയും ഒപ്പമുള്ളവരും കായിക കേരളത്തോട് കാര്യങ്ങള് വിശദീകരിച്ചേ മതിയാകൂ. അവരെ വിശ്വാസത്തിലെടുക്കുകയും വേണം. നഷ്ടപ്പെട്ട വിശ്വാസം വീണ്ടെടുക്കുക അത്ര എളുപ്പമല്ലതാനും. തൊടുന്യായങ്ങള് വിലപ്പോവില്ല. രാജ്യാന്തര ഫുട്ബോളിനെക്കുറിച്ചു നല്ല വിവരമുള്ളവരാണ് ഇവിടത്തെ കളി ആരാധകര്. രാജ്യാന്തര ഷെഡ്യൂള് പ്രകാരം ഇത്തരമൊരു സൗഹൃദമത്സരം അര്ജന്റീനയുടെ പരിപാടിയില് ഇല്ലെന്ന് അവര്ക്കറിയാം.
സ്പോണ്സര് എന്നപേരില് രംഗത്ത് വന്ന ഒരു വ്യക്തിയുടെ വാക്കുകേട്ട് അയാള്ക്കുമുന്നില് ഓച്ഛാനിച്ചുനില്ക്കുന്ന ഒരു കായിക മന്ത്രിയല്ല ഇവിടെ വേണ്ടത്. കേസുകളില് കുടുങ്ങിയ മുന് അനുഭവമുള്ളൊരാളെ പൂര്ണവിശ്വാസത്തോടെ എല്ലാം ഏല്പിച്ചു കൊടുക്കാന് മന്ത്രിക്ക് ആര് അധികാരം കൊടുത്തു? കായികമന്ത്രി പറഞ്ഞതൊക്കെ പാഴ് വാക്കായിട്ടും സര്ക്കാരിനും മിണ്ടാട്ടമില്ല. എന്തെ, മുഖ്യമന്ത്രിയടക്കം ആര്ക്കും ഇക്കാര്യത്തില് ഉത്തരവാദിത്തമില്ലെ? മെസ്സിയുടെ വരവിന്റെ പേരില് കൊച്ചി സ്റ്റേഡിയം അന്താരാഷ്ട്ര നിലവാരത്തില് ഒരുക്കാന് താന് എഴുപതു കോടി ചെലവിട്ടെന്നു പറയുന്ന സ്പോണ്സര് അതിന്റെ പേരില് സ്റ്റേഡിയത്തിന് മേല് അവകാശവും ആവശ്യപ്പെടുന്നുണ്ടത്രേ. ലക്ഷ്യവും കണ്ണും എങ്ങോട്ടെന്ന് വ്യക്തം.
ഫുട്ബോള് ലോകത്തെ എക്കാലത്തെയും മികച്ച താരനിരയില് പെട്ട കളിക്കാരനാണ് മെസ്സി എന്ന അര്ജന്റീനക്കാരന്. ക്രിക്കറ്റില് സച്ചിന് തെണ്ടുല്ക്കറെപ്പോലെ ഫുട്ബോളില് മെസ്സിയെ ദൈവതുല്യം ആരാധിക്കുന്നവര് ഏറെയുള്ള നാടാണ് കേരളം. ആ ആവേശത്തിലാണ് ചിലരുടെ കണ്ണ് പതിഞ്ഞത്. നാടിന്റെ കായിക പ്രേമം നിഷ്കളങ്കവും ആത്മാര്ഥവുമാണ്. അതുമുതലെടുക്കാനിറങ്ങിയവരുടെ കാര്യം അങ്ങനെയല്ല. സന്തോഷ് ട്രോഫിയിലടക്കമുള്ള അഴിമതിയുടെ കഥ ഏറെ കേട്ടവരാണ് മലയാളികള്. പക്ഷെ ഇങ്ങനെയൊരു അന്താരാഷ്ട്ര ഗൂഢാലോചന പുതിയ അവതാരം തന്നെ.
