കോട്ടയം: യുവാവിനെ തട്ടിക്കൊണ്ട് പോയി മര്‍ദ്ദിക്കാന്‍ ക്വട്ടേഷന്‍ സംഘത്തെ ഏര്‍പ്പാടാക്കി നല്‍കിയെന്ന ആരോപണത്തെത്തുടര്‍ന്ന് കേരളാ കോണ്‍ഗ്രസ് എം നേതാവിനെ പാര്‍ട്ടിയില്‍ നിന്ന് പുറത്താക്കി. റെനീഷ് കാരിമറ്റത്തിലിനെയാണ് മാണി വിഭാഗം യൂത്ത് ഫ്രണ്ടിന്റെ എല്ലാ ചുമതലകളില്‍ നിന്നും നീക്കിയത്.
കോട്ടയം ഗാന്ധിനഗറില്‍ യുവാവിനെ തട്ടിക്കൊണ്ട് പോയി മര്‍ദ്ദിച്ചവശനാക്കി പണവും മൊബൈലും കവര്‍ന്ന സംഭവം ക്വട്ടേഷന്‍ ആക്രമണമാണെന്ന വാര്‍ത്തയെത്തുടര്‍ന്നാണ് നടപടി. പച്ചക്കറി കടയുടമ നിസാറിന് ക്വട്ടേഷന്‍ സംഘത്തെ ഏര്‍പ്പാടാക്കി കൊടുത്തത് റെനീഷാണെന്നും വാര്‍ത്തയുണ്ടായിരുന്നു.
പച്ചക്കറി കടയിലെ മുന്‍ ജീവനക്കാരനായ യുവാവിനെ തല്ലാനാണ് ക്വട്ടേഷന്‍ നല്‍കിയത്. ഇരുവര്‍ക്കുമെതിരേ ഗാന്ധിനഗര്‍ പൊലീസ് കേസെടുത്തിരുന്നു. സംഭവത്തില്‍ അഞ്ച് ക്വട്ടേഷന്‍ സംഘാംഗങ്ങള്‍ റിമാന്‍ഡിലാണ്.
