ന്യൂദല്‍ഹി: കൃത്യതയുള്ള ആക്രമണ ശേഷിക്ക് വലിയ പ്രോത്സാഹനമായി മാറുന്ന തരത്തില്‍, 800 കിലോമീറ്റര്‍ ദൂരപരിധിയുള്ള പുതിയ ബ്രഹ്മോസ് സൂപ്പര്‍സോണിക് ക്രൂയിസ് മിസൈല്‍ പ്രതിരോധ സംവിധാനത്തില്‍ ഉള്‍പ്പെടുത്താനൊരുങ്ങി ഭാരതം. 2027 അവസാനത്തോടെ ഈ മിസൈല്‍ പൂര്‍ണമായും പ്രവര്‍ത്തനക്ഷമമാകുമെന്ന് പ്രതിരോധ വൃത്തങ്ങള്‍ വ്യക്തമാക്കി.
കൂടാതെ 200 കിലോമീറ്ററിലധികം ദൂരപരിധിയുള്ള അസ്ത്ര എയര്‍ ടു എയര്‍ മിസൈലും 2026-27 ല്‍ വികസിപ്പിക്കാന്‍ പദ്ധതിയിടുന്നു. 2027 അവസാനത്തോടെ പരമ്പരാഗത മിസൈല്‍ പൂര്‍ണമായും തയ്യാറാകുമെന്നും പ്രതിരോധ വൃത്തങ്ങള്‍ അറിയിച്ചു.
ശബ്ദത്തിന്റെ മൂന്നിരട്ടി വേഗത്തില്‍ പറക്കുന്ന നിലവിലുള്ള 450 കിലോമീറ്റര്‍ ദൂരപരിധിയുള്ള ബ്രഹ്മോസ് മിസൈലുകള്‍ ഭാരതത്തിലെ ഏറ്റവും മാരകമായ ആയുധങ്ങളില്‍ ഒന്നാണ്. എന്നാല്‍ പുതിയ പതിപ്പിന് 800 കിലോമീറ്റര്‍ അകലെയുള്ള ശത്രുക്കളെ ലക്ഷ്യമിടാന്‍ കഴിയും.
ഇതിന്റെ റാംജെറ്റ് എഞ്ചിന്‍ ഇതിനോടകം തയ്യാറായിക്കഴിഞ്ഞു. കൂടുതല്‍ പരീക്ഷണങ്ങള്‍ നിലവില്‍ നടന്നുകൊണ്ടിരിക്കുകയാണ്.
മിസൈലിന്റെ ആന്തരിക ഐഎന്‍എസ് (ഇനേര്‍ഷ്യല്‍ നാവിഗേഷന്‍ സിസ്റ്റം), ബാഹ്യ ജിഎന്‍എസ്എസ് (ഗ്ലോബല്‍ നാവിഗേഷന്‍ സാറ്റലൈറ്റ് സിസ്റ്റം) എന്നിവയുടെ അനുയോജ്യത ഈ പരീക്ഷണങ്ങള്‍ പരിശോധിച്ചുവരികയാണ്. മിസൈല്‍ സ്ഥിരമായി ലക്ഷ്യത്തിലെത്തുകയും, ജാമിംഗിനെ പ്രതിരോധിക്കുകയും, കരുത്തുറ്റതായി തുടരുകയും ചെയ്യുന്നുണ്ടെന്ന് ഉറപ്പാക്കുക എന്നതാണ് ലക്ഷ്യം.
ഈ പരീക്ഷണങ്ങള്‍ വിജയിച്ചാല്‍ മിസൈല്‍ പൂര്‍ണ്ണമായും തയ്യാറാകും.
