ശിവഗിരി: വ്യാഴാഴ്ച ശിവഗിരിയില് എത്തുന്ന രാഷ്ട്രപതി ദ്രൗപതി മുര്മുവിനെ വരവേല്ക്കാന് ശിവഗിരിയില് ഒരുക്കങ്ങള് അവസാന ഘട്ടത്തിലേക്ക്. ശ്രീനാരായണ ഗുരുദേവന്റെ മഹാസമാധിയുടെ രണ്ടുവര്ഷം നീണ്ടുനില്ക്കുന്ന ശതാബ്ദി സമ്മേളനം ഉദ്ഘാടനം ചെയ്യുകയാണ് മുഖ്യപരിപാടി.
ശിവഗിരി മഠത്തിലും പരിസരപ്രദേശങ്ങളിലുമെല്ലാം കേന്ദ്ര, സംസ്ഥാന സര്ക്കാര് ഉദ്യോഗസ്ഥരുടെ പരിശോധനകളും പൂര്ത്തിയാകുന്നു. സംസ്ഥാനത്തിന്റെ എല്ലാ മേഖലകളില്നിന്നും എല്ലാ ശ്രീനാരായണ പ്രസ്ഥാനങ്ങളുടെയും പ്രവര്ത്തകരും ശിവഗിരി ബന്ധുക്കളും ഉള്പ്പെടെയുള്ളവര് ചടങ്ങുകളില് പങ്കെടുക്കും.
ശിവഗിരി തീര്ത്ഥാടന സമ്മേളന ഓഡിറ്റോറിയത്തിലാണ് സമ്മേളനം നടക്കുക. രാഷ്ട്രപതിയുടെ ശിവഗിരി സന്ദര്ശനം ചരിത്ര പ്രാധാന്യമേറിയതായതിനാല് വര്ക്കലയിലും പരിസരപ്രദേശങ്ങളിലും ഉള്ള എല്ലാ സാമൂഹിക സാംസ്കാരിക പ്രസ്ഥാനങ്ങളും പരിപാടി വിജയിപ്പിക്കുന്നതിന് മുന്നിരയില് നിന്ന് സഹകരിച്ചു വരുന്നു.
അന്തര്ദേശീയ തലത്തില് ശ്രദ്ധിക്കപ്പെടുന്ന ഈ ചടങ്ങിലൂടെ വര്ക്കലയുടെ സമഗ്രമായ വികസനത്തിന് വഴിയൊരുക്കുമെന്നും പ്രതീക്ഷിക്കുന്നു. ശ്രീനാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ, ജനറല് സെക്രട്ടറി സ്വാമി ശുഭാംഗാനന്ദ, ട്രഷറര് സ്വാമി ശാരദാനന്ദ തുടങ്ങിയവരുടെ നേതൃത്വത്തില് ശിവഗിരി മഠത്തിലെ മുഴുവന് സന്യാസി ശ്രേഷ്ഠരും രാഷ്ട്രപതിയുടെ സന്ദര്ശനം വിജയിപ്പിക്കാനുള്ള തയ്യാറെടുപ്പുകള്ക്ക് നേതൃത്വം നല്കുന്നു.
