ബ്രസല്സ്: പഞ്ചാബ് നാഷണല് ബാങ്കില് നിന്ന് കോടികള് വായ്പയെടുത്തു മുങ്ങിയ വജ്ര വ്യാപാരി മെഹുല് ചോക്സിയെ ഭാരതത്തിന് കൈമാറാന് ബെല്ജിയം കോടതി ഉത്തരവിട്ടു. കേന്ദ്ര സര്ക്കാരിന്റെ നിയമ പോരാട്ടത്തിന്റെയും നയതന്ത്രത്തിന്റെയും വിജയമാണിത്.
ബാങ്കുകളെ കബളിപ്പിച്ചു കോടികളുമായി മുങ്ങി, ഇപ്പോള് ബ്രിട്ടീഷ് ജയിലിലുള്ള വജ്ര വ്യാപാരി നീരവ് മോദിയുടെ അമ്മാവനാണ് ചോക്സി. അപ്പീലിനടക്കം ചോക്സിക്ക് അവസരമുണ്ടെങ്കിലും ഇയാളെ വിട്ടുകിട്ടാനുള്ള പ്രയാസമേറിയ ആദ്യ കടമ്പയാണ് കടന്നത്. ചോക്സിയും നീരവും ചേര്ന്ന് പിഎന്ബിയില് നിന്നു തട്ടിയെടുത്തത് 13,000 കോടി രൂപയാണ്. അന്വേഷണം മുറുകിയതോടെ തന്ത്രപൂര്വം വിദേശത്തേക്കു കടന്ന ചോക്സി ആന്റിഗ്വ ആന്ഡ് ബാര്ബുഡയില് താവളമടിച്ചു. ഇവിടത്തെ പൗരത്വവുമെടുത്തു. കുടുങ്ങുമെന്നുറപ്പായതോടെ 2023ല് ബെല്ജിയത്തിലെത്തി. ഇക്കഴിഞ്ഞ ഏപ്രിലില് ഇയാളെ ഭാരതത്തിന്റെ ആവശ്യ പ്രകാരം ബെല്ജിയന് അധികൃതര് അറസ്റ്റ് ചെയ്തു.
ഭാരതത്തിന് കൈമാറാന് ബെല്ജിയം കോടതി ഉത്തരവിട്ട സാമ്പത്തിക കുറ്റവാളിയായ വജ്രവ്യാപാരി മെഹുല് ചോക്സിയും ഭാരതത്തിന് കൈമാറാന് ലണ്ടന് കോടതി ഉത്തരവിട്ട അനന്തരവന് നീരവ് മോദിയും ചേര്ന്ന് പഞ്ചാബ് നാഷണല് ബാങ്കില് നിന്ന് തട്ടിയത് മുതലും പലിശയും അടക്കം 13,000 കോടി രൂപ. വായ്പയെടുത്ത് തിരിച്ചടയ്ക്കാതെ മുങ്ങുകയായിരുന്നു. ഉദ്യോഗസ്ഥരുടെ സഹായത്തോടെ വ്യാജരേഖകള് ചമച്ചാണ് വായ്പ എടുത്തത്. ഇതില് നീരവ് ബ്രിട്ടനിലാണ് എത്തിയത്. ഇയാള്ക്കെതിരായ നിയമപോരാട്ടം വന് വിജയത്തില് എത്തിയിരുന്നു. കീഴ്ക്കോടതികള് മുതല് പരമോന്നത കോടതി വരെ നടത്തിയ പോരാട്ടങ്ങള്ക്ക് ഒടുവില് ഇയാളെ ഭാരതത്തിന് കൈമാറാന് ഉത്തരവുകള് ലഭിച്ചു. ഇയാള് ഇപ്പോള് ലണ്ടനില് ജയിലിലാണ്. നിയമത്തിന്റെ ചില നൂലാമാലകള് കൂടിയുണ്ട്. അവ കഴിഞ്ഞാലുടന് ഇയാളെ ഭാരതത്തിന് ലഭിക്കും. ചോക്സിയെ വിട്ടുകിട്ടാന് അല്പ്പം കൂടി കഴിയും. എന്തെന്നാല് ഇയാള് അപ്പീല് നല്കും, മാത്രമല്ല നിയമപോരാട്ടം ഉയര്ന്ന കോടതികളിലേക്കും നീളാം. എങ്കിലും അവയിലെല്ലാം ജയിക്കുമെന്ന് അന്വേഷണ ഏജന്സികള്ക്ക് ഉറപ്പാണ്.
ഭാരതത്തിന്റെ നിര്ദേശപ്രകാരം ചോക്സിയെ അറസ്റ്റു ചെയ്ത ബെല്ജിയം അധികൃതരുടെ നടപടി ശരിവെച്ച കോടതിവിധിയെ ഭാരതത്തിലെ അന്വേഷണ ഏജന്സികള് സ്വാഗതം ചെയ്തു. ഭാരതത്തിന് കൈമാറിയാല് ഇയാളെ മുംബൈയിലെ ആര്തര് റോഡ് ജയിലില് സുരക്ഷിതമായി പാര്പ്പിക്കുമെന്നും പീഡനം ഉണ്ടാവില്ലെന്നും അന്വേഷണ ഏജന്സികള് ബെല്ജിയത്തിന് ഉറപ്പു നല്കിയിട്ടുണ്ട്. 15 അടി വീതിയും 20 അടി നീളവമുള്ള, വായുസഞ്ചാരവും ടോയ്ലറ്റും ഉള്ള മുറിയാകും നല്കുക. ഇയാള്ക്ക് ആന്റിഗ്വന് പൗരത്വമുള്ളതിനാല് അവരുടെ ആവശ്യമാണിത്.
