ന്യൂദല്‍ഹി: തദ്ദേശീയമായി വികസിപ്പിച്ച അസ്ത്ര മാര്‍ക്ക് 2 മിസൈലുകള്‍ വ്യോമസേനയിലേക്ക് ചേര്‍ക്കും. ഡിആര്‍ഡിഒ വികസിപ്പിച്ച ഈ മിസൈലിന് 200 കിലോമീറ്റര്‍ ദൂരത്തുള്ള ലക്ഷ്യങ്ങളെ വരെ തകര്‍ക്കാന്‍ സാധിക്കും. 700 അസ്ത്ര മാര്‍ക്ക് 2 മിസൈലുകളാണ് ആദ്യഘട്ടത്തില്‍ വ്യോമ സേനയ്‌ക്ക് കൈമാറുക.
സുഖോയ് എസ്‌യു-30എംകെഐ മള്‍ട്ടിറോള്‍ ഫൈറ്ററുകളിലും ലൈറ്റ് കോംബാറ്റ് എയര്‍ക്രാഫ്റ്റ് (എല്‍സിഎ) തേജസ് ഫൈറ്റര്‍ ജെറ്റ് ഫ്‌ളീറ്റുകളിലും ഈ മിസൈലുകള്‍ ഘടിപ്പിക്കാന്‍ സാധിക്കും. 160 കിലോമീറ്ററായിരുന്നു അസ്ത്രയുടെ ആദ്യ പതിപ്പായ മാര്‍ക്ക് 1ന്റെ പരിധി. ഇതിന്റെ വിപുലീകരിച്ച പതിപ്പാണ് അസ്ത്ര മാര്‍ക്ക് 2.
ഓപ്പറേഷന്‍ സിന്ദൂറില്‍ പാകിസ്ഥാന്റെ യുദ്ധവിമാനങ്ങളെ ഭാരതത്തിന്റെ അസ്ത്ര മാര്‍ക്ക് 1 മിസൈലുകള്‍ തകര്‍ത്തിട്ടുണ്ട്. ഭാരതത്തിന്റെ പ്രതിരോധ സംവിധാനങ്ങള്‍ക്ക് മുതല്‍ക്കൂട്ടാണ് അസ്ത്ര മാര്‍ക്ക് 2 മിസൈലുകള്‍.
ഹിന്ദുസ്ഥാന്‍ എയറോനോട്ടിക്‌സ് ലിമിറ്റഡ് (എച്ച്എഎല്‍), ഭാരത് ഡൈനാമിസ് ലിമിറ്റഡ് തുടങ്ങി അമ്പതിലധികം പൊതു, സ്വകാര്യ സ്ഥാപനങ്ങള്‍ ഈ പ്രൊജക്റ്റില്‍ ഡിആര്‍ഡിഒയുമായി സഹകരിച്ചിട്ടുണ്ട്.
