പത്തനംതിട്ട: കീഴ് വായ്പൂരില് 61 കാരിയായ വീട്ടമ്മയെ പൊലീസ് ഉദ്യോഗസ്ഥന്റെ ഭാര്യ തീകൊളുത്തി കൊലപ്പെടുത്താന് ശ്രമിച്ചെന്ന പരാതിയില് ഇലക്ട്രിക്കല് ഇന്സ്പെക്ടറേറ്റിലേയും ഫോറന്സിക് വകുപ്പിലേയും ഉദ്യോഗസ്ഥര് സംഭവം നടന്ന വീട്ടില് പരിശോധന നടത്തി. 61 കാരി ലതയുടെ മൊഴിയില് വൈരുദ്ധ്യങ്ങള് ഉള്ളതിനാല് തീപിടിത്തം എങ്ങനെ ഉണ്ടായി എന്ന് കണ്ടെത്താനായിരുന്നു പരിശോധന. 35 ശതമാനം പൊള്ളലേറ്റ ലത കോട്ടയം മെഡിക്കല് കോളേജ് ആശുപത്രിയില് ചികിത്സയിലാണ്. രണ്ട് കുഞ്ഞുങ്ങള് ഉള്ളതിനാല് പ്രതി സുമയ്യയെ പൊലീസ് കസ്റ്റഡിയിലെടുത്ത് മഹിളാ മന്ദിരത്തില് പാര്പ്പിച്ചിരിക്കുകയാണ്.
വ്യാഴാഴ്ച വൈകിട്ടാണ് ലതക്ക് പൊള്ളലേറ്റത്. സമീപത്തെ പൊലീസ് ക്വാട്ടേഴ്സില് താമസിക്കുന്ന സിവില് പൊലീസ് ഓഫീസറുടെ ഭാര്യ സുമയ്യ സ്വര്ണാഭരണങ്ങള് ചോദിച്ചിട്ട് നല്കാത്തതിലൂള്ള വിരോധത്തില് തീ കൊളുത്തിയെന്നാണ് ലതയുടെ പരാതി. കയ്യുംകാലും കെട്ടിയിട്ട ശേഷം മാലയും വളകളും അപഹരിച്ചുവെന്നും ലത പരാതിയില് പറയുന്നു.
