കൊച്ചി : ശബരിമല ശ്രീകോവില് വാതിലും ദ്വാരപാലക ശില്പങ്ങളും സ്വര്ണം പൂശിയ ശേഷം ബാക്കി വന്ന സ്വര്ണം ഉണ്ണികൃഷ്ണന് പോറ്റി നല്കിയത് കല്പേഷ് എന്നയാള്ക്കാണെന്ന് ഹൈക്കോടതി ഉത്തരവില് പറയുന്നു. കല്പേഷിന്റെ പക്കല് 2019 ഒക്ടോബര് 10ന് എത്തിയത് 474.9 ഗ്രാം സ്വര്ണമാണെന്നും ഹൈക്കോടതി പരാമര്ശിക്കുന്നു.
കല്പേഷ് ആരാണന്നും സ്വര്ണക്കൊള്ളയില് ഇയാള്ക്കുള്ള പങ്കെന്തെന്നും ഇനി വ്യക്തമാകേണ്ടതുണ്ട്. ഉണ്ണികൃഷ്ണന് പോറ്റിയുമായി വളരെ അടുത്ത ബന്ധമാണ് ഇയാള്ക്കുളളതാണെന്നാണ് സൂചനകള്.ശബരിമല സ്വര്ണക്കൊള്ളയുമായി ബന്ധപ്പെട്ട് ഏറ്റവും ദുരൂഹമായി നില്ക്കുന്ന പേരുകളിലൊന്നാണ് കല്പേഷിന്റേത്.
ബാക്കി വന്ന സ്വര്ണം സ്മാര്ട്ട് ക്രിയേഷന്സ്, കല്പേഷിനാണ് കൈമാറിയതെന്ന് ഉണ്ണികൃഷ്ണന് പോറ്റി പറഞ്ഞതായാണ് റിപ്പോര്ട്ടുകളിലുള്ളത്. 2019 മാര്ച്ച് മാസവും 2019 ഓഗസ്റ്റ് മാസത്തിലുമാണ് ഉണ്ണികൃഷ്ണന് പോറ്റി സ്മാര്ട്ട് ക്രിയേഷന്സിനെ സമീപിക്കുന്നത്. മാര്ച്ച് മാസത്തില് ശ്രീകോവിലിന്റെ വാതിലില് സ്വര്ണം പൂശുന്നതിനും ഓഗസ്റ്റ് മാസത്തില് ദ്വാരപാലകശില്പ്പത്തില് സ്വര്ണം പൂശുന്നതിനുമാണ് പോറ്റി സ്മാര്ട്ട് ക്രിയേഷന്സിനെ സമീപിച്ചത്. ഈ പ്രവൃത്തികള്ക്ക് ശേഷം ബാക്കി വന്ന 475 ഗ്രാമോളം സ്വര്ണം ഉണ്ണികൃഷ്ണന് പോറ്റിയുടെ കൈയിലെത്തിയിട്ടുണ്ടാകാം. അത് ദേവസ്വം ബോര്ഡിന് കൈമാറിയിട്ടില്ലെന്നാണ് അന്വേഷണത്തിലെ കണ്ടെത്തല്.ഈ സ്വര്ണം കല്പേഷിന്റെ കൈയില് എത്തിയെന്നാണ് പുറത്തുവന്ന വിവരം.
