മനില: ഫിലിപ്പീൻസിലെ മിൻഡാനാവോ മേഖലയിൽ വെള്ളിയാഴ്ച 7.6 തീവ്രത രേഖപ്പെടുത്തിയ ഭൂകമ്പം ഉണ്ടായതിനെ തുടർന്ന് സമീപ തീരപ്രദേശങ്ങൾക്ക് സുനാമി മുന്നറിയിപ്പ് നൽകിയതായി യൂറോപ്യൻ-മെഡിറ്ററേനിയൻ സീസ്മോളജിക്കൽ സെന്റർ (ഇഎംഎസ് സി) അറിയിച്ചു.
58 കിലോമീറ്റർ താഴ്ചയിലാണ് ഭൂകമ്പം ഉണ്ടായതെന്നും തീവ്രത 7.6 ആയിരുന്നെന്നുമാണ് റിപ്പോർട്ട്. ആദ്യം 7.2 എന്നാണ് റിപ്പോർട്ട് ചെയ്തിരുന്നത്, പിന്നീട് അത് 7.6 ആണെന്ന് തിരിച്ചറിയുകയായിരുന്നു.
ഭൂകമ്പത്തിന്റെ പ്രഭവകേന്ദ്രത്തിൽ നിന്ന് 300 കിലോമീറ്റർ ചുറ്റളവിലുള്ള തീരദേശ പ്രദേശങ്ങളെ അപകടകരമായ സുനാമി തിരമാലകൾ ബാധിച്ചേക്കാമെന്ന് യുഎസ് സുനാമി മുന്നറിയിപ്പ് സംവിധാനം മുന്നറിയിപ്പ് നൽകി.
ദക്ഷിണ ഫിലിപ്പീൻസിൽ ഉണ്ടായ ശക്തമായ ഭൂകമ്പത്തെത്തുടർന്ന് ഇന്തോനേഷ്യ വടക്കൻ സുലവേസി, പപ്പുവ മേഖലകളിലും സുനാമി മുന്നറിയിപ്പ് നൽകിയതായി ഇന്തോനേഷ്യയുടെ ജിയോഫിസിക്സ് ഏജൻസി അറിയിച്ചു.
ഇന്തോനേഷ്യയുടെ തീരപ്രദേശങ്ങളിൽ 50 സെന്റീമീറ്റർ വരെ ഉയരത്തിൽ സുനാമി തിരമാലകൾ ഉണ്ടാകാനുള്ള സാധ്യതയുണ്ടെന്ന് ഏജൻസിയുടെ മോഡലിംഗ് സൂചിപ്പിച്ചതായി ഒരു പ്രസ്താവനയിൽ പറഞ്ഞു.
