മേനോൻ സാർ ഗുരുസ്ഥാനീയൻ: മോഹൻലാൽ

കൊച്ചി: ആർഎസ്എസ് മുൻ പ്രാന്ത സംഘചാലകും കേരളത്തിലെ പ്രമുഖ ചാർട്ടേഡ് അക്കൗണ്ടന്റും വിശ്വശാന്തി ഫൗണ്ടേഷന്റെ ആദ്യ മാനേജിങ് ഡയറക്ടറുമായിരുന്ന പി.ഇ.ബി. മേനോൻ സാറിന് അനുശോചനമർപ്പിച്ച് മോഹൻലാൽ. സോഷ്യൽ മീഡിയ പേജുകളിലൂടെയാണ് അനുശോചനം രേഖപ്പെടുത്തിയത്.“ആദരണീയനായ പി.ഇ.ബി മേനോൻ സാർ നമ്മോട് വിടപറഞ്ഞു,” എന്ന് കുറിച്ചുകൊണ്ടാണ് മോഹൻലാൽ ദുഃഖം പങ്കുവെച്ചത്. സമസ്ത മേഖലകളെയും മാനവികതയുമായി സമന്വയിപ്പിച്ച് സേവനത്തിന്റെ പാതയിലൂടെ സഞ്ചരിച്ച ഗുരുസ്ഥാനീയനായ വ്യക്തിയായിരുന്നു അദ്ദേഹം എന്ന് മോഹൻലാൽ ഓർമ്മിച്ചു. കേരളത്തിലെ അറിയപ്പെടുന്ന ചാർട്ടേഡ് അക്കൗണ്ടന്റ് കൂടിയാണ് മേനോൻ സാർ.വിശ്വശാന്തി ഫൗണ്ടേഷന്റെ ആദ്യത്തെ മാനേജിംഗ് ഡയറക്ടറും മാർഗ്ഗദർശിയുമായിരുന്നു അദ്ദേഹം. ഒട്ടേറെ ജീവകാരുണ്യപ്രവർത്തനങ്ങൾക്ക് നേതൃത്വം നൽകുകയും, അവയെല്ലാം വിജയകരമായി നടപ്പിലാക്കാൻ അശ്രാന്തപരിശ്രമം നടത്തുകയും, മറ്റുള്ളവർക്ക് പ്രചോദനം പകരുകയും ചെയ്തു എന്ന് മോഹൻലാൽ അനുസ്മരിച്ചു.അദ്ദേഹത്തിന്റെ കുടുംബത്തിന്റെ ദു:ഖത്തിൽ പങ്കുചേർന്നുകൊണ്ട്, വേദനയോടെ ആദരാഞ്ജലികൾ അർപ്പിക്കുന്നതായും മോഹൻലാൽ കൂട്ടിച്ചേർത്തു.