തിരുവനന്തപുരം: ദേശീയ വിദ്യാഭ്യാസ നയത്തിന്റെ കരട് രേഖയില് പറയുന്നത് ഹിന്ദി സംസാരിക്കാത്ത സംസ്ഥാനങ്ങളില് ഹിന്ദി പഠിപ്പിക്കണമെന്നാണ്. എന്നാല് കേരളത്തില് എഴുന്നൂറിലധികം ലോവര് പ്രൈമറി വിദ്യാലയങ്ങളില് ഹിന്ദി അധ്യാപകരില്ല. കരാറടിസ്ഥാനത്തില് നിയമിച്ച നാമമാത്രമായ അധ്യാപകരാണ് ഇപ്പോള് എല്പി വിഭാഗത്തില് അഞ്ചാം ക്ളാസില് ഹിന്ദി പഠിപ്പിക്കുന്നത്. എന്നാല് പലപ്പോഴും പാര്ട്ട് ടൈം ഹിന്ദി അധ്യാപകര് മറ്റു വിഷയങ്ങളും പഠിപ്പിക്കാന് നിയോഗിക്കപ്പെടുന്നു. എല് പി സ്കൂളുകളില് ഹിന്ദി ഭാഷാ അധ്യാപകരുടെ തസ്തിക സൃഷ്ടിക്കുന്നതിനുള്ള വ്യവസ്ഥയില്ലെന്നാണ് വിദ്യാഭ്യാസ വകുപ്പ് പറയുന്നത്. ഹിന്ദി പഠനം
ലോവര് പ്രൈമറി ക്ലാസ്സുകളില് മുതല് ആരംഭിച്ചാല് മാത്രമെ ഹിന്ദി പഠനം മെച്ചപ്പെടുത്താന് സാധിക്കുകയുള്ളു.
നിര്ദിഷ്ട യോഗ്യതകളോടെ ജോലിയില് പ്രവേശിച്ച് സര്വ്വീസില് തുടരുന്ന അധ്യാപകര് കേരള ടീച്ചര് എലിജിബിലിറ്റി ടെസ്റ്റ് (കെ ടെറ്റ്) നേടണമെന്ന നിബന്ധനയും ഹിന്ദി അധ്യാപകര്ക്ക് തിരിച്ചടിയായിരിക്കുകയാണ്. 2012-2013 വര്ഷത്തിലാണ് അധ്യാപക യോഗ്യതാ പരീക്ഷ പ്രാബല്യത്തില് വരുന്നത്. അതിനു മുമ്പ് ജോലിയില് പ്രവേശിച്ച ഭാഷാധ്യാപകരെയെങ്കിലും യോഗ്യതാ പരീക്ഷയില് നിന്നൊഴിവാക്കണമെന്ന് അധ്യാപക സംഘടനകള് ആവശ്യപ്പെടുന്നു.
യുഎസ്എസ് പരീക്ഷയില് ഹിന്ദി ഭാഷയില് നിന്നുള്ള ചോദ്യങ്ങള് ഉള്പ്പെടുത്തുക, ഹിന്ദിയുടെ പിരീയഡുകള് വര്ദ്ധിപ്പിക്കുക എന്നീ ആവശ്യങ്ങള് ഉന്നയിച്ചുകൊണ്ട് ഹിന്ദി അധ്യാപക് മഞ്ച് (എച്ച്എഎം) സമര രംഗത്താണ്. ഹൈസ്കൂള് അറ്റാച്ച്ഡ് യുപി വിദ്യാലയങ്ങളിലെ ഹിന്ദി അധ്യാപകരുടെ പിരീയഡുകള് 1:20 എന്ന അനുപാതത്തില് പുനഃക്രമീകരിക്കുക, ഹയര് സെക്കന്ഡറിയില് അധ്യാപക വിദ്യാര്ത്ഥി അനുപാതം 1:40 ആയി കുറയ്ക്കുക, സംസ്ഥാനത്തെ മുഴുവന് ഹയര് സെക്കന്ഡറി സ്കൂളുകളിലും ഹിന്ദി പഠിക്കാന് അവസരമൊരുക തുടങ്ങിയ ആവശ്യങ്ങളും എച്ച്എഎം ഉന്നയിക്കുന്നു. സമയബന്ധിതമായി ഹിന്ദി അധ്യാപകര്ക്ക് പ്രമോഷന് സാധ്യമാക്കണമെന്നും കാലഘട്ടത്തിന് ആവശ്യമായ ഭേദഗതികള് വരുത്തി കേരള വിദ്യാഭ്യാസ ചട്ടങ്ങള് പരിഷ്ക്കരിക്കണമെന്നും ഹിന്ദി അധ്യാപക് മഞ്ച് സര്ക്കാരിനോട് ആവശ്യപ്പെടുന്നു.
ഇക്കാര്യങ്ങള് ഉന്നയിച്ച് ഹിന്ദി അധ്യാപക് മഞ്ച് സംസ്ഥാന കമ്മറ്റിയുടെ നേതൃത്വത്തില് 14 ജില്ലകളില് നിന്നുമുള്ള കേരളത്തിലെ പൊതുവിദ്യാലയങ്ങളിലെ ഹിന്ദി അദ്ധ്യാപകര് സെക്രട്ടേറിയറ്റിന് മുന്നില് മാര്ച്ചും ധര്ണയും നടത്തി. സംസ്ഥാന വര്ക്കിംഗ് പ്രസിഡന്റുമാരായ അബ്ദുള് അസീസ്, കെ.എസ്. അഭിലാഷ്, സംസ്ഥാന പ്രസിഡന്റ് വി. ജോസ്, സംസ്ഥാന ജനറല് സെക്രട്ടറി ശിഹാബ് വേദവ്യാസ, സംസ്ഥാന ട്രഷറര് വിനോദ് കുരുവമ്പലം, ആക്ടിങ് സെക്രട്ടറി കെ. ഷൈനി, സംസ്ഥാന വൈസ് പ്രസിഡന്റുമാരായ വി. അജികുമാര് കെ. രാമകൃഷ്ണന്, ഡോ. ഗോവിന്ദരാജ്, കെ. സുനില്കുമാര്, കുമാരി ബിന്ദുഷ, തിരുവനന്തപുരം ജില്ല പ്രസിഡന്റ് എന്.സി. ലേഖ തുടങ്ങിയവര് മാര്ച്ചിനും ധര്ണയ്ക്കും നേതൃത്വം നല്കി.
