കോഴിക്കോട്: മലപ്പുറം ജില്ല വിഭജിക്കണമെന്ന മുസ്ലീം ലീഗ് നേതാവും തിരൂര് എംഎല്എയുമായ കുറുക്കോളി മൊയ്തീന്റെ ആവശ്യം നിരാകരിച്ച് മുസ്ലീം ലീഗ്. മലപ്പുറം ജില്ലാ വിഭജനം മുസ്ലീം ലീഗ് ചര്ച്ച ചെയ്യുകയോ തീരുമാനിക്കുകയോ ചെയ്തിട്ടില്ലെന്ന് പാര്ട്ടി സംസ്ഥാന ജനറല് സെക്രട്ടറി പിഎംഎ സലാം പറഞ്ഞു.
കുറുക്കോളി മൊയ്തീന്റേത് വ്യക്തിപരമായ അഭിപ്രായമാണെന്നും പിഎംഎ സലാം പറഞ്ഞു. കഴിഞ്ഞ ദിവസം മലപ്പുറത്ത് ചേര്ന്ന ജില്ലാ റവന്യൂ അസംബ്ലിയിലാണ് മലപ്പുറം ജില്ല വിഭജിച്ച് തിരൂര് ജില്ല രൂപീകരിക്കണമെന്ന് കുറുക്കോളി മൊയ്തീന് ആവശ്യപ്പെട്ടത്.
താനൂര്, തിരൂരങ്ങാടി, പൊന്നാനി താലൂക്കുകള് ഉള്പ്പെടുത്തി തീരദേശ ജില്ല രൂപീകരിക്കണമെന്നാണ് കുറുക്കോളി മൊയ്തീന് ആവശ്യമുന്നയിച്ചത്. ജനസംഖ്യാനുപാതികമായി വികസനം സാധ്യമാകണമെങ്കില് ജില്ലാ വിഭജനം ആവശ്യമാണെന്ന് മൊയ്തീന് പറഞ്ഞു.
